Problemau a phryderon ar-lein: hysbysebion ar-lein

Pam ydw i’n gweld hysbysebion ar-lein ac ar ba ffurf maen nhw?

Mae cwmnïau’n defnyddio hysbysebion i gyrraedd cynifer o bobl â phosibl. Efallai y gwelwch:

• hysbysebion ar far ochr tudalen neu ap
• hysbysebion naid
• hysbysebion ar y dechrau neu ran o’r ffordd drwy fideo
• negeseuon cyfryngau cymdeithasol noddedig neu y telir amdanyn nhw a ddefnyddir fel hysbysebion
• hysbysebion mewn gemau ar-lein (weithiau bydd eu gwylio yn ennill gwobrau yn y gêm)
• hysbysebion ar gyfer prynu eitemau mewn gemau fel crwyn, offer neu uwchraddio
• hysbysebion yn ymddangos fel rhan o ganlyniadau chwilio

---

Ydy hi’n ddiogel clicio ar hysbyseb ar-lein? 

Mae bob amser yn helpu i fod yn ofalus wrth benderfynu a ddylid clicio ar hysbyseb. Er bod y rhan fwyaf o hysbysebion yn cael eu talu a’u rhedeg gan gwmnïau go iawn, gall rhai hysbysebion fod yn sgamiau.

Bydd llawer o hysbysebion hefyd yn eich tynnu o’r gêm, yr ap neu’r wefan rydych chi ynddi, sy’n gallu gwneud i chi weld cynnwys sy’n peri gofid neu sy’n annisgwyl.

Y peth mwyaf diogel i’w wneud os gwelwch hysbyseb am gynnyrch yr hoffech ei brynu yw mynd i’r wefan swyddogol ar gyfer y cynnyrch a’i brynu yno. Gall hefyd helpu i siarad ag oedolyn, yn enwedig os mai eu harian nhw y byddwch yn ei wario, ac os felly dylech gael caniatâd yn gyntaf.

---

Pam mae fy hysbysebion yn newid ar ôl chwilio ar-lein? 

Mae llawer o wefannau ac apiau yn defnyddio cwcis a thechnoleg arall i weld pa fideos, postiadau a chynnwys arall rydych chi’n rhyngweithio â nhw neu’n chwilio amdanyn nhw fwyaf. Gall hyn eu helpu i weld pa fath o bethau sydd o ddiddordeb i chi a pha fathau o hysbysebion fydd yn apelio atoch chi fwyaf.

Mae hyn yn golygu os ydych chi wedi chwilio am gynnyrch neu wasanaeth ar-lein, rydych chi’n fwy tebygol o weld hysbyseb ar ei gyfer. Gall hyn fod yn ddefnyddiol a gall olygu eich bod yn cael cynigion a hysbysebion sy’n fwy perthnasol i chi. Ond mae rhai pobl yn teimlo’n anghyfforddus o ganlyniad i hynny, neu’n teimlo bod eu dyfeisiau’n gwrando arnyn nhw.

Gallwch gyfyngu ar hyn drwy bori’n breifat neu edrych ar y gosodiadau cwcis ar y gwefannau rydych chi’n ymweld â nhw.

---

Ydy’r apiau a’r gwasanaethau rydw i’n eu defnyddio yn rhoi fy nata i hysbysebwyr? 

Mae hyn yn dibynnu ar yr ap a’r gwasanaethau rydych chi’n eu defnyddio. Pan fyddwch chi’n cofrestru i greu cyfrif, neu’n llwytho ap newydd i lawr, bydd gofyn i chi ddarllen y telerau defnyddio.

Dyma lle byddwch chi’n dod o hyd i sut mae’r ap neu’r wefan yn storio ac yn defnyddio eich data. Gall fod yn demtasiwn mawr i glicio neu dapio’n syth drwy’r cam hwn o gofrestru, ond mae’n bwysig iawn eich bod yn gwybod sut mae ap neu wefan yn defnyddio eich gwybodaeth.

Mae’n gallu bod yn anodd deall yr iaith sy’n cael ei defnyddio yn y telerau hyn, felly mae’n syniad da cael oedolyn i’w darllen gyda chi a’ch helpu chi i benderfynu a ydych chi eisiau cofrestru, ar sail sut maen nhw’n defnyddio eich gwybodaeth.

---

Ydy’r holl hysbysebion rydw i’n eu gweld ar-lein yn ddilys?

Dydy popeth sydd ar-lein ddim yn wir nac yn ddibynadwy, gan gynnwys hysbysebion. Mae arwyddion y gallwch gadw llygad amdanyn nhw i’ch helpu i benderfynu ydy hysbyseb yn ddibynadwy ai peidio.

• A oes camgymeriadau sillafu? Bydd hysbysebion swyddogol ar gyfer y rhan fwyaf o gwmnïau yn cael eu golygu’n ofalus cyn eu cyhoeddi – mae gwallau sillafu neu gamgymeriadau eraill yn arwydd nad yw’r hysbyseb wedi cael ei gwirio cyn postio, felly efallai na fydd yn ddilys.
• Ydy’r hysbyseb yn cynnig bargen wych? Er bod codau hyrwyddo a gostyngiadau pris yn nodweddion cyffredin mewn hysbysebion, os yw rhywbeth yn ymddangos yn rhy dda i fod yn wir, mae’n debyg nad yw’n wir.
• Ydyn nhw’n gofyn am eich gwybodaeth bersonol? Gall hyn fod yn arwydd bod gan yr hysbysebwr fwy o ddiddordeb yn eich data na’ch bod yn prynu rhywbeth, a gall hefyd fod yn arwydd o sgam.
• Ydy hysbyseb yn gwneud honiadau beiddgar am fanteision iechyd neu effeithiolrwydd cynnyrch? Cofiwch fod hysbysebion yn ceisio denu eich sylw a’ch arian, felly byddan nhw bob amser yn gwneud i gynnyrch swnio mor apelgar a phosib.

Mae gan yr Awdurdod Safonau Hysbysebu ganllawiau llym y mae’n rhaid i gwmnïau eu dilyn i sicrhau nad yw hysbysebion yn gamarweiniol, ond gyda’r nifer enfawr o hysbysebion sydd ar gael ar-lein erbyn hyn, mae’n anodd eu monitro nhw i gyd.

Mae rhai dylanwadwyr wedi cael eu hunain mewn trwbl am bostio hysbysebion hefyd, er enghraifft, am:

• beidio â’i gwneud yn glir pan fydd eu postiadau neu eu cynnwys yn hysbyseb
• hysbysebu cynhyrchion sy’n anaddas i blant a phobl ifanc
• gwneud honiadau anghywir am gynnyrch

Un ffordd o weld pa mor ddibynadwy y gallai hysbyseb fod yw chwilio am y cwmni neu'r cynnyrch ac edrych ar adolygiadau cyn penderfynu a hoffech brynu.

---

Rydw i’n gweld hysbysebion sydd ddim yn briodol i fy oedran, beth alla i ei wneud?

Gall rhai hysbysebion fod ar gyfer cynnyrch neu wasanaethau sy’n cael eu creu ar gyfer oedolion neu a allai fod yn amhriodol neu’n sarhaus. Os ydych chi’n gweld hysbyseb sy’n eich poeni neu’n peri gofid i chi:

• siaradwch ag oedolyn dibynadwy am yr hyn rydych chi wedi’i weld a sut roedd yn gwneud i chi deimlo
• ystyriwch adrodd am yr hysbyseb – cymerwch sgrinlun, ciplun neu recordiad sgrin a llenwi ffurflen gwyno'r Awdurdod Safonau Hysbysebu (ASA).

---

Alla i stopio gweld hysbysebion ar-lein? 

Mae llawer o wefannau ac apiau yn gwneud eu harian o hysbysebion, a gall fod yn anodd iawn dianc oddi wrthyn nhw.

Bydd rhai gwasanaethau’n hepgor hysbysebion os ydych chi’n fodlon talu am danysgrifiad.

Efallai y byddwch chi hefyd yn gallu newid yr hysbysebion a ddangosir i chi. Pan fyddwch chi’n gweld hysbyseb ar-lein, bydd rhai gwefannau yn gofyn yn uniongyrchol am eich adborth. Mae gwefannau cyfryngau cymdeithasol yn aml yn rhoi’r opsiwn ‘gweld llai o hysbysebion fel hyn’ neu ‘gweld mwy o bostiadau gan y cwmni hwn’ sy’n gallu helpu i siapio’r hysbysebion rydych chi’n eu gweld.

Gallwch chi hefyd ddewis gweld llai o hysbysebion gan gwmni penodol neu am gynnyrch penodol drwy gau’r hysbyseb. Mae hyn yn rhoi gwybod i’r wefan nad oes gennych chi ddiddordeb yn yr hysbyseb.