Newidiadau allweddol ar gyfer Medi 2023
Rydym wedi gwneud rhai newidiadau i'r ffordd rydym yn nodi cynnydd dysgwyr yn adroddiadau asesiadau personol.
Trosolwg
Rydym wedi gwneud rhai newidiadau i'r ffordd rydym yn nodi cynnydd dysgwyr yn adroddiadau asesiadau personol. Mae hyn yn ei gwneud yn haws deall cynnydd o dan Cwricwlwm i Gymru.
Rydym wedi ymgorffori 'amser dysgu' yn y sgoriau cynnydd a’r sgoriau safonedig ar sail oedran. Byddwn nawr yn dangos cynnydd dysgwyr drwy gydol pob blwyddyn ysgol, yn ogystal â rhwng un flwyddyn ysgol a’r llall.
Rydym hefyd wedi ailsafoni ym mhob pwnc sy’n destun asesiad personol. Rydym wedi ailwerthuso sut mae'r garfan genedlaethol yn perfformio ar sail y data diweddaraf.
Mae hyn yn golygu y byddwch yn gweld rhai newidiadau yn adroddiadau asesiadau o fis Medi 2023. Ni fydd hyn yn effeithio ar asesiadau a wneir hyd at ddiwedd blwyddyn ysgol 2022 i 2023.
Yr wybodaeth fanwl am sgiliau dysgwyr ddylai barhau i fod yn brif ffocws wrth ichi gynllunio ar gyfer cynnydd dysgwyr. Ni ddylid defnyddio sgoriau cynnydd a sgoriau safonedig ar sail oedran heb gyd-destun.
Newidiadau o fis Medi 2023
Ychwanegu amser dysgu
O fis Medi 2023, bydd sgoriau cynnydd a sgoriau safonedig ar sail oedran yn ystyried 'amser dysgu’. Bydd hyn yn ei gwneud yn haws deall cynnydd o dan Cwricwlwm i Gymru. Mae’n golygu bod sgoriau dysgwyr yn cael eu haddasu yn ôl:
- dyddiad cwblhau asesiad
- y datblygiad a welwyd yn ystod y flwyddyn ysgol
Ailsafoni asesiadau personol
Rydym wedi ailsafoni'r asesiadau personol. Mae hyn yn golygu bod y garfan gyfeirio a ddefnyddir i gyfrifo'r sgoriau cynnydd a’r sgoriau safonedig ar sail oedran wedi cael ei diweddaru.
Byddwn yn defnyddio carfan ddysgwyr 2022 i 2023 fel y garfan gyfeirio newydd o hyn ymlaen. O fis Medi 2023 cyfrifir sgoriau asesiadau yn unol â'r ailsafoni.
Adroddiadau
Rydym wedi diweddaru'r cromliniau cynnydd mewn adroddiadau i adlewyrchu'r ailsafoni. Mae'r newidiadau hyn yn berthnasol i bob asesiad a wneir o fis Medi 2023.
Manteision y newidiadau i ysgolion a dysgwyr
Bydd cynnwys amser dysgu a'r ailsafoni:
- yn rhoi'r wybodaeth fwyaf dibynadwy a chyfredol i ysgolion i’w helpu i gynllunio cynnydd dysgwyr
- yn ei gwneud yn haws nodi p’un a yw dysgwyr yn gwneud cynnydd cyson
- yn ei gwneud yn haws i ymarferwyr gymharu cynnydd dysgwyr sy'n gwneud asesiadau ar wahanol adegau o'r flwyddyn
- yn darparu cromliniau cynnydd sy'n adlewyrchu'r data diweddaraf sydd ar gael
- yn sicrhau dosbarthiad gwell o sgoriau cynnydd a sgoriau safonedig ar sail oedran mewn adroddiadau grŵp. Bydd hyn yn ei gwneud yn haws i athrawon wahaniaethu rhwng cyrhaeddiad un unigolyn a’r llall
- yn dilyn arferion gorau rhyngwladol o ran asesu, sef diweddaru carfanau cyfeirio yn rheolaidd i adlewyrchu'r newid yn nosbarthiad cyrhaeddiad dysgwyr dros amser
- yn alinio pob pwnc sy’n destun asesiad, gan ddefnyddio'r un garfan gyfeirio (roedd ein carfanau cyfeirio blaenorol yn gymysgedd o’r cyfnod cyn COVID/ar ôl COVID)
Y rhesymeg dros ailsafoni yn haf 2023
Cyflwynwyd yr asesiadau personol yn raddol dros gyfnod o 4 blynedd. Cynhyrchwyd y sgoriau cynnydd a’r sgoriau safonedig ar sail oedran ar gyfer pob pwnc:
- yn seiliedig ar wahanol garfanau
- ar wahanol adegau
Gwnaed y gwaith safoni ar gyfer Rhifedd (Gweithdrefnol) yn 2019 cyn pandemig COVID. Ar gyfer gwaith safoni Darllen a Rhifedd (Rhesymu), defnyddiwyd data ôl-COVID o flwyddyn ysgol 2020 i 2021. Mae'n debygol bod y lefelau cyrhaeddiad cenedlaethol wedi newid ym mhob pwnc ers y broses safoni flaenorol. Mae'r ailsafoni yn gyfle i ystyried y newidiadau hyn. Bydd yn darparu'r darlun mwyaf cywir ar gyfer pob un o'r pedwar pwnc.
Newidiadau yn yr adroddiadau
Asesiadau a wneir o fis Medi 2023
Bydd dysgwyr yn derbyn sgoriau cynnydd a sgoriau safonedig ar sail oedran yn sgil y gwaith ailsafoni, ar sail dosbarthiad sgoriau dysgwyr ledled Cymru yn y flwyddyn gyfeirio newydd. Rydym wedi newid siapiau'r cromliniau cynnydd yn adroddiadau pob pwnc i ddangos dosbarthiad cyrhaeddiad yn y flwyddyn gyfeirio newydd, a datblygiad arferol dysgwyr yn ystod blwyddyn ysgol.
Cynnwys 'amser dysgu’
Bydd sgoriau cynnydd a sgoriau safonedig ar sail oedran nawr yn ystyried amser dysgu, sy’n golygu:
- mae dysgwyr sy'n cynnal yr un sgoriau yn eu hasesiadau dros amser, neu sy’n cael sgoriau tebyg, yn gwneud cynnydd cyson
- mae angen i ddysgwyr ddangos cyrhaeddiad uwch mewn termau absoliwt yn ddiweddarach yn y flwyddyn ysgol er mwyn cael yr un sgôr ag a gawsant yn gynharach yn y flwyddyn
- bydd y pwyntiau ar gyfer pob asesiad blaenorol a newydd yn cael eu dangos ar bob siart cynnydd newydd
Adroddiadau hyd at ac yn cynnwys 2022 i 2023
Bydd data hanesyddol hyd at ac yn cynnwys blwyddyn ysgol 2022 i 2023 yn aros yr un fath.
Ni wneir unrhyw newidiadau i sgoriau asesiadau a wnaed eisoes. Byddant yn parhau i fod wedi’u plotio ar bob adroddiad cynnydd unigol a grŵp.
O fis Medi 2023, bydd siâp y gromlin gynnydd yn seiliedig ar y broses safoni newydd. Mae’n bosibl, felly, y bydd safle'r pwyntiau asesu ar y siart yn ymddangos ychydig yn wahanol i’w safle mewn adroddiadau blaenorol.
Sut i gymharu cynnydd y flwyddyn hon â blynyddoedd blaenorol
Yn ystod y flwyddyn bontio hon, byddwn yn cynnwys 'amser dysgu' am y tro cyntaf. Mewn asesiadau lle mae'r dysgwr yn dangos cyrhaeddiad tebyg:
- bydd y rhai a wneir yn gynnar ym mlwyddyn ysgol 2023 i 2024 yn tueddu i arwain at sgoriau uwch, o gymharu â hydref 2022
- bydd asesiadau a wneir yn ddiweddarach yn y flwyddyn ysgol yn tueddu i arwain at sgoriau is nag y mae’r defnyddwyr yn ei ddisgwyl, o gymharu â haf 2023
Wrth gymharu cyrhaeddiad ac adroddiadau, mae'n bwysig cofio, o fis Medi 2023 ymlaen:
- bod sgoriau safonedig ar sail cynnydd ac oedran yn ystyried 'amser dysgu’
- bod y cromliniau cynnydd yn siart adroddiad cynnydd dysgwyr a chynnydd grŵp wedi'u diweddaru i adlewyrchu'r data diweddaraf
Wrth gymharu'r cromliniau hyn â chromliniau adroddiadau blynyddoedd blaenorol, fe welwch y bydd cromlin eleni:
- ychydig yn uwch ar ddechrau'r flwyddyn
- ychydig yn is ar ddiwedd y flwyddyn
Bydd hyn yn cynrychioli'r data cynnydd diweddaraf.
Rhestr dermau
Safoni
Safoni yw'r broses o gyfrifo sgoriau cynnydd a sgoriau safonedig ar sail oedran. Mae'r sgoriau hyn yn gyfeirbwynt hawdd o ran sut mae cyrhaeddiad dysgwyr yn cymharu ag eraill yn eu carfan. Er enghraifft, mae dysgwyr sydd â sgoriau cynnydd o 1000 wedi dangos lefel gyrhaeddiad sydd ar y cyfartaledd cenedlaethol.
Rydym yn cymharu cyrhaeddiad dysgwyr â chyrhaeddiad y 'garfan gyfeirio' pan gynhaliwyd y broses safoni. O fis Medi 2023, bydd y garfan gyfeirio ar gyfer pob pwnc yn cynnwys dysgwyr a wnaeth yr asesiadau ym mlwyddyn ysgol 2022 i 2023.
Dros amser, mae dosbarthiad cyrhaeddiad dysgwyr mewn unrhyw asesiad yn newid. Mae’n arfer da ailsafoni asesiadau bob ychydig flynyddoedd. Mae hyn yn sicrhau bod sgoriau yn parhau i adlewyrchu'n gywir sur mae dysgwr yn cymharu â gweddill ei garfan.
Mae ailsafoni yn ailwerthuso lefel cyrhaeddiad pob sgôr safonedig ar sail cynnydd ac oedran. Mae'n ailasesu cyrhaeddiad y dysgwr cyffredin (a dysgwyr ar bob lefel arall).
Rydym yn cyfrifo'r sgôr cynnydd drwy gymharu canlyniad dysgwr â chanlyniadau dysgwyr eraill yn ei grŵp blwyddyn ledled Cymru. 950 i 1050 yw'r ystod sgoriau, a 1000 yw'r cyfartaledd. Darperir y sgôr hon ar waelod pob adroddiad grŵp sydd ar gael i ysgolion.
Fe'i defnyddir i olrhain cynnydd ar gromlin y siart ar adroddiadau cynnydd dysgwr unigol a grŵp.
Caiff y sgôr safonedig ar sail oedran ei chyfrifo drwy gymharu sgôr asesiad dysgwr â sgoriau disgyblion eraill yng Nghymru a anwyd yn yr un mis a'r un flwyddyn. 70 i 130 yw'r ystod sgoriau, a 100 yw'r cyfartaledd. Dangosir y sgôr safonedig ar sail oedran, a nodir yn asesiad diweddaraf y dysgwr, ar ei adroddiad cynnydd.
Amser dysgu
Mae amser dysgu yn cyfeirio at yr adeg yn y flwyddyn ysgol pan fydd dysgwr yn cwblhau asesiad. Mae'n caniatáu ar gyfer y cynnydd y mae dysgwr yn ei wneud o fewn y flwyddyn yn ogystal â rhwng un flwyddyn a’r llall.
Fel rheol, ni fyddai dysgwyr sy'n gwneud asesiad yn gynnar yn y flwyddyn ysgol yn gwneud cystal â phe baent yn gwneud asesiad tuag at ddiwedd y flwyddyn ysgol. Y rheswm am hyn yw ei fod wedi manteisio o flwyddyn ychwanegol o ddysgu.
O dan y dull newydd, bydd y sgôr cynnydd a’r sgôr safonedig ar sail oedran yn ystyried amser dysgu. Mae hyn yn golygu bod sgôr dysgwyr yn cael ei haddasu yn ôl:
- dyddiad cwblhau asesiad
- y datblygiad a welwyd o fewn y garfan gyfeirio yn ystod y flwyddyn ysgol
Mae'r sgoriau wedi cael eu diweddaru i ystyried amser dysgu er mwyn:
- ei gwneud yn haws deall cynnydd o dan Cwricwlwm i Gymru
- darparu gwell gwybodaeth i ysgolion i gefnogi cynnydd dysgwyr a’i gwneud yn haws gweld p’un a yw dysgwyr yn gwneud cynnydd cyson
- ei gwneud yn haws i athrawon gymharu cynnydd dysgwyr sy'n gwneud asesiadau ar wahanol adegau o'r flwyddyn
Yn dilyn y newidiadau hyn, ystyrir bod dysgwyr sy'n cynnal yr un sgoriau yn eu hasesiadau dros amser, neu sy’n cael sgoriau tebyg, yn gwneud cynnydd cyson.