Meithrin perthynas amhriodol ar-lein

Yr hyn sydd angen i chi ei wybod

Mae meithrin perthynas amhriodol ar-lein yn disgrifio proses pan fo rhywun yn dod yn gyfaill i blentyn ar-lein ac yn ennyn ei ymddiriedaeth gyda’r bwriad o’i ddefnyddio, ei ecsbloetio neu achosi niwed iddo. Bydd y rhai sy’n meithrin perthynas amhriodol ar-lein yn aml yn datblygu cysylltiad emosiynol â phlentyn i ennyn ei ymddiriedaeth a gall troseddwyr ecsbloetio problemau fel unigrwydd, ynysigrwydd, hunan-barch isel, anawsterau teuluol neu mewn perthynas neu pan fo rhywun yn archwilio rhywioldeb.

Gall y sawl sy’n gwneud hyn fod yn gyfarwydd i’r plentyn neu fe all fod yn gwbl ddieithr. Mae’r rhai sy’n gwneud hyn yn defnyddio amrywiaeth o dactegau i ennill grym a rheolaeth dros eu dioddefwr.

Mae datblygiadau cyflym a defnydd cynyddol technoleg AI wedi ei gwneud yn haws meithrin perthynas amhriodol â phlant a phobl ifanc ar-lein. Gellir defnyddio offer AI cynhyrchiol i greu proffiliau, delweddau a sgyrsiau realistig i argyhoeddi pobl ifanc eu bod nhw'n cyfathrebu â chyfoedion. Gellir defnyddio AI cynhyrchiol hefyd i drin delweddau, er enghraifft ffugio noethni, y gellir eu defnyddio wedyn i gamfanteisio drwy fygwth.   

Gall y rhain gynnwys esgus bod yn ffrind anfygythiol, fflyrtio, llwgrwobrwyo gyda rhoddion go iawn neu rithwir, canmol, blacmelio ac ynysu’r plentyn oddi wrth ffrindiau a theulu. Gall addysgu plant o oedran cynnar beth yw perthnasoedd iach a llawn parch eu helpu i ddeall pwy i ymddiried ynddo ar-lein a’u grymuso i osgoi neu ymdrin â chyswllt amhriodol yn ddiogel.