Threads
Canllaw i deuluoedd sydd â gwybodaeth allweddol am 'Threads', gan gynnwys y dosbarthiad oedran, terminoleg allweddol, risgiau a chyfarwyddiadau ar gyfer galluogi rheolaethau rhieni a gosodiadau diogelwch.
Ymwadiad
Mae Threads yn ap newydd sy’n newid yn gyflym. Oherwydd mynychder y newidiadau yn y gofod hwn, byddwch yn ymwybodol bod y canllaw hwn i’r ap Threads yn gywir ym mis Gorffennaf 2023.
Mae Threads, a elwir hefyd yn ‘Threads, an Instagram app’, yn ap cyfryngau cymdeithasol microblogio a lansiwyd ym mis Gorffennaf 2023 ac a ddatblygwyd gan Instagram a’i riant-gwmni Meta. Mae’r ap ar gael ar ddyfeisiau symudol yn unig, yn benodol o Google Play a’r Apple App Store. Yn debyg i X (a elwir gynt yn ‘Twitter’), mae Threads yn hysbysebu ei hun fel cydran seiliedig ar destun i Instagram, er y gall defnyddwyr lanlwytho lluniau a fideos hefyd. Gall defnyddwyr hefyd gysoni cysylltiadau, y bobl y maent yn eu dilyn a’u dilynwyr o’u cyfrifon Instagram i Threads os byddant yn dewis gwneud hynny, er nad yw hyn yn hanfodol. Er y gall defnyddwyr chwilio am ddefnyddwyr eraill a’u dilyn, bydd eu ffrwd yn dangos cynnwys ar hap a chynnwys o gyfrifon y maent yn eu dilyn. Mae Threads yn ap sy’n tyfu’n gyflym, gyda thros 50 miliwn o lawrlwythiadau ar Google Play. Mae Threads am ddim i’w ddefnyddio ar hyn o bryd, ond mae angen cyfrif Instagram i ddefnyddio’r ap.
Sgôr oedran swyddogol
Yr oedran isaf ar gyfer defnyddwyr Threads yw 13, er nad oes unrhyw ddull trylwyr o wirio oedran.
Mae angen cyfrif Instagram ar ddefnyddwyr i gofrestru. Bydd unrhyw osodiadau cyfrif ar Instagram, gan gynnwys rheolaethau rhieni, yn cael eu mewnforio i Threads fel rhan o’r broses o greu cyfrif.
Bydd pob cyfrif a sefydlir gan ddefnyddwyr o dan 16 oed yn cael eu sefydlu gyda gosodiadau preifat yn ddiofyn. Dim ond os yw defnyddwyr wedi darparu eu dyddiad geni cywir, sy’n dangos eu bod o dan 16 oed, y bydd yr opsiwn hwn yn cael ei gynnig. Bydd pob cyfrif arall yn cael ei sefydlu gyda gosodiadau cyhoeddus yn ddiofyn.
Sut mae plant a phobl ifanc yn defnyddio’r ap
Mae Threads yn ap sy’n tyfu, ymhlith oedolion a phobl ifanc. Mae’n hysbysebu amgylchedd cyfryngau cymdeithasol mwy diogel, gyda mwy o gymedroli, o gymharu â safleoedd microblogio eraill megis X (a elwir gynt yn ‘Twitter’), sy’n rhy negyddol ym marn rhai defnyddwyr iau.
Mae apiau cyfryngau cymdeithasol yn boblogaidd ymhlith pobl ifanc, gan y gallant gysylltu â’u hoff enwogion, arweinwyr a dylanwadwyr a’u dilyn. Gall postiadau ar Threads amrywio o fod yn addysgiadol, megis straeon newyddion, i fod yn ddoniol ac yn ddychanol. Mae’r ffrwd postiadau ar Threads yn cael ei rheoli gan algorithm sy’n cymysgu cynnwys gan ddefnyddwyr newydd a chyfrifon eraill mae’r defnyddiwr yn eu dilyn. Gall natur ar hap postiadau ar Threads ddal diddordeb pobl ifanc drwy ddarparu llif cyson o gynnwys. Mae pobl ifanc yn aml yn cael eu denu gan y ffaith y gall defnyddwyr eraill ‘hoffi’ eu cynnwys ac yn gweld dilynwyr fel math o ddilysiad a chymeradwyaeth.
Nodweddion a therminoleg allweddol
-
Mae hyn yn cyfeirio at ddefnyddwyr yn tagio neu’n ‘sôn’ am ddefnyddiwr arall yn uniongyrchol, a fydd yn hysbysu’r defnyddiwr hwnnw am yr edefyn neu’r postiad.
-
Neges safonol o hyd at 500 o nodau. Gall fod yn destun ysgrifenedig, neu’n ddelwedd, fideo, neu’r ddau.
-
Rhaglenni bach sy’n rhedeg o fewn yr ap ac sy’n cael eu creu gan ddatblygwyr trydydd parti. Mae ‘botiaid’, talfyriad o ‘robotiaid’, yn rhaglenni cyfrifiadurol yn Threads sydd wedi’u dylunio i efelychu gweithgarwch dynol a chwblhau tasgau ailadroddus. Yn Threads, mae botiaid yn cyflawni tasgau megis postio diweddariadau awtomataidd ar gyfrifon penodol, neu hysbysebu gwasanaeth penodol yn ddi-baid (sbamio) ar edafedd defnyddwyr eraill.
-
Defnyddir terfyn cyfradd i helpu i reoli cyfanswm y gweithgarwch ar Threads i’w atal rhag cael ei orlwytho a thorri oherwydd postiadau a sylwadau newydd. I ddefnyddwyr, bydd hyn yn cyfyngu ar nifer y postiadau a sylwadau ar Threads y gallant eu gweld mewn diwrnod.
-
Dyma’r ffrwd cynnwys sy’n dangos edafedd a phostiadau gan ddefnyddwyr eraill.
-
Mae dylanwadwr yn ddefnyddiwr cyfryngau cymdeithasol sy’n gallu dylanwadu ar ddefnyddwyr eraill oherwydd nifer y bobl sy’n eu dilyn. Mae dylanwadwyr yn aml yn cael eu defnyddio i helpu i farchnata nwyddau.
-
Mae ailbostiad yn edefyn neu bostiad sy’n cael ei rannu gan ddefnyddiwr arall.
-
Gall defnyddwyr ‘hoffi’ edefyn defnyddiwr arall drwy ddefnyddio’r eicon siâp calon.
-
Bydd gan ddefnyddiwr wedi’i ddilysu farc gwirio glas sy’n ymddangos ar ei broffil a’i bostiadau. Mae defnyddwyr yn cael eu gwirio naill ai am fod yn gyfrif a ystyrir yn nodedig ac o ddiddordeb i’r cyhoedd, neu fel tanysgrifiwr i Meta Verified.
Risgiau posibl
Cynnwys
Mae Threads wedi’i farchnata i ddechrau fel yr ap testun i gystadlu â X (a elwir gynt yn ‘Twitter’). Mae’r dirywiad yn y defnydd o X oherwydd newidiadau mawr (megis codi ffi am y tic glas) wedi golygu bod llawer o ddefnyddwyr wedi troi at ddewisiadau eraill megis Threads fel platfform amgen i bostio a gweld cynnwys. Fodd bynnag, dylai defnyddwyr fod yn ymwybodol bod y cysylltiad agos rhwng Threads ac Instagram yn golygu bod llawer o gynnwys gweledol, megis lluniau a fideos. Gyda defnyddwyr yn gallu postio hyd at ddeg llun mewn un postiad - yr un fath ag ar ap rhannu delweddau Instagram - byddai’n ymddangos bod llawer o ddefnyddwyr yn postio’r un cynnwys ar Instagram a Threads, er bod Thread yn cael ei hysbysebu fel ap testun.
Dylai rhieni a gofalwyr fod yn ymwybodol, gan fod rhai defnyddwyr yn postio’r un delweddau ag ar Instagram, y gall y delweddau fod wedi’u golygu’n helaeth a defnyddio effeithiau a hidlyddion. Dylid nodi nad oes gan Threads swyddogaeth camera neu hidlo yn uniongyrchol ar yr ap ond ei fod yn caniatáu i ddefnyddwyr bostio lluniau a gynhyrchir ar apiau eraill. Gall gor-amlygiad i gynnwys sydd wedi’i olygu’n helaeth arwain at ddelwedd corff negyddol a hunan-barch isel. Mae rhai defnyddwyr Threads yn postio delweddau ohonyn nhw’u hunain ar yr ap ac yn gofyn am ddilysiad allanol, megis gofyn cwestiynau fel "rate my body”. Gall sylwadau negyddol ar bostiadau fel y rhain hefyd arwain at ddelwedd corff negyddol a hunan-barch isel. Fel gydag apiau rhannu delweddau poblogaidd eraill, siaradwch â’ch plentyn am faint o’r lluniau a welant ar y platfform fydd wedi’u golygu, sy’n golygu nad ydynt yn adlewyrchiad cywir ohonyn nhw na’u bywydau.
Ar hyn o bryd, mae Threads yn dewis cynnwys ar hap drwy ddefnyddio algorithmau, sydd ddim yn cynnig llawer o ffyrdd i’r defnyddiwr reoli’r cynnwys y mae’n ei weld. Er y gall y ffrwd hon ddangos cynnwys gan unigolion neu grwpiau mae’r defnyddiwr yn eu dilyn, bydd hefyd yn dangos postiadau poblogaidd ar hap. Mae hyn hefyd yn annog rhai defnyddwyr i geisio gwneud edafedd cyffrous y bydd nifer fawr o bobol yn eu ‘hoffi’, i ymddangos wedyn ar y dudalen gweithgarwch. Gall defnyddwyr geisio rheoli cynnwys ffrwd drwy guddio geiriau, ymadroddion neu emojis penodol sy’n gwneud iddynt deimlo’n anghyfforddus neu’n peri gofid iddynt. Gall hyn helpu i hidlo cynnwys gofidus a dryslyd ymlaen llaw, neu gynnwys a all arwain at ddelwedd corff negyddol. Am fwy o wybodaeth am sut i wneud hyn, ewch i’r adran ‘Rheoli rhyngweithio a chynnwys’ yn y canllaw hwn. Atgoffwch eich plentyn i siarad â chi os yw’n gweld unrhyw gynnwys ar Threads sy’n ei ddrysu neu’n peri gofid iddo.
Mae gwasanaeth testun Threads wedi’i wneud yn darged ar gyfer cyfrifon bot trydydd parti, sy’n lansio ‘ymosodiadau sbam’ yn erbyn defnyddwyr eraill. Mae hyn wedi arwain at greu terfyn cyfradd, tebyg i X, a all effeithio ar nifer y postiadau y gall defnyddiwr eu gweld ar yr ap. Cynghorir defnyddwyr Threads y mae ymosodiadau sbam wedi effeithio arnynt i’w riportio i’r platfform. Am wybodaeth ar sut i riportio, ewch i’r adran ‘Riportio a blocio’ yn y canllaw hwn.
Cysylltu ag eraill
I greu cyfrif Threads, mae angen i ddefnyddwyr ei gysylltu â chyfrif Instagram sy’n bodoli eisoes. Fel rhan o’r broses sefydlu, gall defnyddwyr ddewis cysylltu â’u cysylltiadau Instagram os ydyn nhw hefyd ar Threads. Mae hyn yn golygu y gellir poblogi cyfrif newydd yn awtomatig gyda dilynwyr, neu drwy ddod o hyd i ddefnyddwyr eraill i gysylltu â nhw yn organig.
Ar gyfer defnyddwyr o dan 16 oed, dylai’r cyfrif Threads gael ei sefydlu gyda gosodiadau preifat yn ddiofyn, fel gydag Instagram. Mae hyn yn golygu mai dim ond pobl y maent wedi’u cysylltu â nhw ar yr ap all weld eu hedafedd, yn hytrach na phob defnyddiwr. Bydd holl osodiadau cyfrif yn cael eu hetifeddu o gyfrif Instagram defnyddiwr. Argymhellir bod rhieni a gofalwyr yn gwirio gosodiadau’r cyfrif Threads a’r cyfrif Instagram i sicrhau eu bod yn gywir.
Ar hyn o bryd, nid yw Threads yn caniatáu sgyrsiau neu negeseuon preifat rhwng defnyddwyr. Fodd bynnag, os yw defnyddiwr yn postio cynnwys o gyfrif cyhoeddus, gall pob defnyddiwr Threads arall wneud sylwadau arno. Gall hyn wneud defnyddwyr yn agored i sylwadau negyddol neu niweidiol. Gall defnyddwyr addasu pwy all wneud sylwadau ar eu postiadau, megis eu cyfyngu i bobl y maent yn eu dilyn neu bobl y maent yn sôn amdanynt yn uniongyrchol yn eu postiadau; gallai hyn helpu i atal amlygiad i sylwadau negyddol neu fwlio ar-lein. Siaradwch â’ch plentyn am bwy maen nhw’n cysylltu â nhw ar yr ap a cheisiwch argymell ei fod yn postio o gyfrif preifat i helpu i’w amddiffyn rhag sylwadau diangen neu niweidiol.
Ymddygiad defnyddwyr
Oherwydd ansefydlogrwydd X (a elwir gynt yn ‘Twitter’) ar hyn o bryd, mae’n bosib y bydd llawer o gyn-ddefnyddwyr X yn symud i Threads fel eu platfform o ddewis ar gyfer rhannu eu barn a’u safbwyntiau â chynulleidfa ehangach. Siaradwch â’ch plentyn am y math o bobl y mae’n dewis eu dilyn ar y platfform a’i annog i feddwl yn feirniadol am yr edafedd y mae’n eu darllen. Atgoffwch eich plentyn i siarad â chi os yw’n darllen neu’n gweld rhywbeth sy’n peri gofid iddo neu os nad yw’n ei ddeall.
Ar hyn o bryd, mae Threads yn defnyddio’r un canllawiau cymunedol ag Instagram. Fel llawer o blatfformau cyfryngau cymdeithasol eraill, gall fod achosion o fwlio a throlio ar-lein. Anogwch eich plentyn i feddwl yn ofalus am y cynnwys y mae’n dewis ei rannu ar Threads, gan ei atgoffa y gall unrhyw beth y mae’n ei bostio gael ei gipio’n rhwydd fel sgrinlun a’i rannu’n eang. Gofalwch fod eich plentyn yn gwybod y gall fod yn anodd cadw perchnogaeth ar unrhyw gynnwys ar ôl iddo gael ei rannu ar-lein.
Dylunio, data a chostau
Mae Meta wedi dweud nad oes unrhyw hysbysebion nad ydynt gan ddylanwadwyr ar Threads ar hyn o bryd. Mae hyn yn golygu na fydd defnyddwyr yn gweld hysbysebion penodol ar y platfform. Fodd bynnag, yn yr un modd ag Instagram, gall dylanwadwyr a phob defnyddiwr arall ddefnyddio Threads i hysbysebu cynhyrchion neu wasanaethau penodol. Yn wahanol i Instagram, ar hyn o bryd nid yw’n ofynnol i ddefnyddwyr ddefnyddio’r hashnod ‘#ads’ i wahaniaethu pan fydd cynnwys sy’n cael ei bostio yn hysbyseb y telir amdano. Gall hyn fod yn ddryslyd i rai defnyddwyr, gan efallai na fyddant yn gallu gwahaniaethu’n rhwydd rhwng cynnwys hyrwyddo a chynnwys dilys. Siaradwch â’ch plentyn am rôl dylanwadwyr a’i atgoffa bod dylanwadwyr wedi cael eu talu i hyrwyddo rhai cynhyrchion. Argymhellir y dylai rhieni a gofalwyr wirio’n rheolaidd bolisi Meta ynghylch hysbysebion, gan y gallai’r polisi dim hysbysebu newid wrth i’r ap ddatblygu.
Mae dyluniad Threads yn golygu bod defnyddwyr yn agored i sgrolio diddiwedd o ran cynnwys. Mae hyn yn golygu y bydd yr adran gweithgarwch yn parhau i ddarparu cynnwys diddiwedd i ddefnyddwyr ei weld, a all arwain at rai defnyddwyr yn treulio oriau ar y platfform yn sgrolio drwy gynnwys. Siaradwch â’ch plentyn am sut mae platfformau wedi’u dylunio i ddal diddordeb defnyddwyr am gyfnodau hir a’i annog i gymryd seibiannau o’r ap yn aml. Gellir dod o hyd i wybodaeth am sut i ddefnyddio’r ddewislen gosodiadau i helpu i reoli amser yn yr adran ‘Rheoli amser a phryniannau’ yn y canllaw hwn.
Fel llawer o apiau cyfryngau cymdeithasol eraill, mae Threads yn dangos nifer y bobl sydd wedi ‘hoffi’ postiad a’r sylwadau arno. Gwyddom fod pobl ifanc yn gweld nifer y bobl sydd wedi ‘hoffi’ postiad a sylwadau ar bostiad fel math o ddilysiad, a gallant ddatblygu emosiynau negyddol os nad ydynt yn teimlo bod eu cynnwys yn denu digon o ddiddordeb. Siaradwch â’ch plentyn i sicrhau ei fod yn gwybod nad yw nifer y bobl sy’n ‘hoffi’ postiad yn arwydd o’i werth fel person.
Mae Threads yn casglu swm uchel iawn o ddata personol ar ddefnyddwyr, gan gynnwys lleoliad ffisegol, manylion personol megis enw, rhif ffôn, credoau gwleidyddol a chrefyddol, a llawer o bethau eraill am y defnyddiwr. Siaradwch â’ch plentyn am sut mae cwmnïau technoleg mawr yn gwneud arian o ddata defnyddwyr a helpwch ef i ystyried a yw’n gyffyrddus bod Meta yn casglu’r math hwn o wybodaeth ganddo. Gall hyn ei helpu i benderfynu a yw am greu cyfrif Threads ai peidio.
Awgrymiadau ar gyfer cadw’ch plentyn yn ddiogel
-
Bydd gan ddefnyddwyr o dan 18 oed yr opsiwn o osod eu cyfrif yn un preifat, tra bod cyfrifon defnyddwyr o dan 16 oed yn cael eu gosod fel rhai preifat yn ddiofyn. Gall defnyddwyr newydd hefyd ddewis rhwng creu cyfrif cyhoeddus neu breifat ar Threads pan fyddant yn ymuno am y tro cyntaf.
I wneud cyfrif yn un preifat:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a throwch yr opsiwn ‘Private profile’ ymlaen.
-
Mae gan ddefnyddwyr lawer iawn o reolaeth o ran cyfyngu ar ryngweithio ar Threads. Gall defnyddwyr analluogi galwadau penodol, y cyfeirir atynt fel @mentions, a chuddio geiriau, ymadroddion a hyd yn oed emojis penodol a all beri gofid i ddefnyddwyr. Mae Threads yn cynnig gosodiadau rheoli ar gyfer postiadau hefyd, lle gall defnyddwyr guddio faint o bobl sydd wedi ‘hoffi’ eu postiadau. Gwneir hyn drwy’r gosodiad cysylltiedig ar Instagram. Gall defnyddwyr hefyd addasu pwy all wneud sylwadau ar edafedd y maent yn eu postio, a all eu hatal rhag gweld sylwadau negyddol a niweidiol gan ddefnyddwyr eraill.
I addasu pwy all wneud sylwadau ar bostiad ar Threads:
- Ewch i’ch postiad rydych chi am addasu’r gosodiadau sylwadau arno. Gallwch wneud hyn drwy fynd i’ch proffil.
- Dewiswch y tri dot ‘...’ yng nghornel dde uchaf y postiad cysylltiedig.
- Dewiswch ‘Who can reply’ a dewiswch naill ai ‘Profiles you follow’ neu ‘Mentioned Only’.
I guddio pwy sydd wedi ‘hoffi’ postiad ar Threads:
- Ewch i’ch postiad rydych chi am guddio pwy sydd wedi ei ‘hoffi’. Gallwch wneud hyn drwy fynd i’ch proffil.
- Dewiswch y tri dot ‘...’ yng nghornel dde uchaf y postiad cysylltiedig.
- Dewiswch ‘Hide like count’.
I analluogi @mentions:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘@Mentions’.
- Newidiwch ‘Allow @mentions from everyone’ i ‘No one’.
I guddio geiriau ac ymadroddion sarhaus:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘Hidden words’.
- Trowch yr opsiwn ‘Offensive words and phrases’ ymlaen.
I guddio geiriau ac ymadroddion penodol:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘Hidden words’.
- Symudwch yr opsiwn ‘Custom words and phrases’ i’r safle ymlaen a dewiswch ‘Manage custom words and phrases’.
- Ysgrifennwch y geiriau, yr ymadroddion a’r emojis penodol yr hoffech chi eu cuddio.
-
Gall defnyddwyr riportio a blocio defnyddwyr eraill a all fod yn eu poeni neu’n ymddwyn yn amhriodol ar y platfform. Yn ogystal, gall defnyddwyr dawelu defnyddwyr eraill y maent am eu dilyn ond nad ydynt bellach am weld unrhyw gynnwys ganddynt. Gall defnyddwyr hefyd gyfyngu defnyddwyr eraill, sy’n cael yr effaith o guddio unrhyw sylwadau a negeseuon gan y defnyddiwr sydd wedi’i gyfyngu ond heb yn wybod iddo.
I flocio defnyddiwr:
- Ewch i broffil y defnyddiwr rydych chi am ei flocio.
- Dewiswch y tri dot ‘...’ yn y gornel dde uchaf.
- Dewiswch ‘Block’.
Neu
- Dewiswch y tri dot ‘...’ ar edefyn a bostiwyd gan y cyfrif rydych chi am ei flocio.
- Dewiswch ‘Block’.
I riportio defnyddiwr:
- Ewch i broffil y defnyddiwr yr hoffech chi ei riportio.
- Dewiswch y tri dot ‘...’ yn y gornel dde uchaf.
- Dewiswch ‘Report’.
I riportio neges Threads neu ddelwedd a bostiwyd i Threads:
- Dewiswch y tri dot ‘...’ ar yr edefyn rydych chi am ei riportio.
- Dewiswch ‘Report’.
- Dewiswch y rheswm pam rydych chi am riportio’r edefyn.
I dawelu defnyddiwr:
- Ewch i broffil y defnyddiwr rydych chi am ei dawelu.
- Dewiswch y tri dot ‘...’ yn y gornel dde uchaf.
- Dewiswch ‘Mute’.
Neu
- Dewiswch y tri dot ‘...’ ar edefyn a bostiwyd gan y cyfrif rydych chi am ei dawelu.
- Dewiswch ‘Mute’.
I gyfyngu defnyddiwr:
- Ewch i broffil y defnyddiwr rydych chi am ei gyfyngu.
- Dewiswch y tri dot ‘...’ yn y gornel dde uchaf.
- Dewiswch ‘Restrict’.
-
Ar hyn o bryd, nid oes unrhyw opsiynau prynu ar gael ar Threads. Fodd bynnag, mae ganddo offer ar gyfer rheoli hysbysiadau ac amser sgrin. Mae’r nodwedd ‘Take a break’ yn caniatáu i ddefnyddwyr osod terfyn amser dynodedig mewn unedau o 10, 20 a 30 munud a fydd yn atgoffa’r defnyddiwr i ddiffodd yr ap ar ôl cyfnod o bori yn y terfyn amser hwnnw. Gall hyn hefyd helpu defnyddwyr i osgoi cael eu dal mewn cylch sgrolio diddiwedd.
I reoli hysbysiadau:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘Notifications’.
- Dewiswch ‘Pause all’ a dewiswch amser i atal hysbysiadau.
Neu
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘Notifications’.
- Dewiswch naill ai ‘Threads and replies’ neu ‘Following and followers’.
- Dewiswch ‘Off’ ar bob opsiwn hysbysu cysylltiedig i analluogi hysbysiadau.
I alluogi ‘Take a break’:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘Account’.
- Dewiswch ‘Take a break’ a dewiswch ar ôl faint o amser yr hoffech chi gael eich atgoffa i gymryd seibiant.
-
Gall defnyddwyr analluogi eu cyfrif Threads yn unig. I ddileu cyfrif yn gyfan gwbl, rhaid i ddefnyddwyr hefyd ddileu eu cyfrif Instagram.
I analluogi cyfrif Threads:
- Ewch i’ch proffil a dewiswch y ddwy linell yn y gornel dde uchaf i gael mynediad at y ddewislen ‘Settings’.
- Dewiswch ‘Privacy’ a dewiswch ‘Deactivate profile’.
- Cadarnhewch eich bod am analluogi eich proffil Threads drwy ddewis ‘Deactivate Threads profile’.
Awgrymiadau ychwanegol
Mae Threads yn cynnal canolfan gymorth fach ar brif dudalen Instagram. Gan mai Instagram yw rhiant-ap Threads, mae canllaw Instagram i rieni yn cynnwys gwybodaeth a manylion perthnasol pellach i ddefnyddwyr Threads.
Ar hyn o bryd, mae Threads yn ei gamau rhyddhau cynnar. Mae’n bwysig eich bod yn rhoi sylw manwl i ddatblygiadau a newidiadau newydd ar blatfform Threads wrth i’r ap aeddfedu.