Discord
Canllaw i deuluoedd sydd â gwybodaeth allweddol am 'Discord', gan gynnwys y dosbarthiad oedran, terminoleg allweddol, risgiau a chyfarwyddiadau ar gyfer galluogi rheolaethau rhieni a gosodiadau diogelwch.
- Rhan o
Mae Discord yn ap cyfryngau cymdeithasol a sgwrsio am ddim sy'n boblogaidd gyda chwaraewyr gemau, sy'n defnyddio'r platfform i gyfathrebu wrth chwarae gemau. Mae llawer o ddefnyddwyr yn mwynhau sgwrsio â chwaraewyr eraill a'u gwylio’n chwarae a defnyddio'r ap i gyfnewid awgrymiadau a rhannu technegau. Gall sgyrsiau fod naill ai’n un i un neu mewn grwp neu 'weinydd' gêm-benodol (grwpiau cymuned neu ffrindiau). Mae gan gemau ar-lein poblogaidd, fel Fortnite eu sianeli Discord swyddogol eu hunain, lle gall cefnogwyr wylio ei gilydd yn chwarae a siarad am y gêm.
Gyda dros 150 miliwn o ddefnyddwyr mewn mwy nag 80 o wledydd, mae Discord wedi dod yn llwyfan poblogaidd i chwaraewyr gemau ledled y byd ddod at ei gilydd. Er bod Discord yn gysylltiedig yn bennaf â chwaraewyr gemau, mae'r platfform yn cael ei ddefnyddio gan eraill hefyd i sgwrsio a rhyngweithio ar bob math o bynciau eraill, yn amrywio o ffasiwn i chwaraeon, gyda miloedd o sianeli ar gael. Mae Discord ar gael ar ddyfeisiau Apple ac Android, yn ogystal â chyfrifiaduron.
Sgôr oedran swyddogol
Yr isafswm oedran a argymhellir ar gyfer Discord yw 13. Fodd bynnag, nid oes gan yr ap unrhyw ddulliau gwirio oedran trwyadl.
Diweddarodd Discord ei sgôr oedran i 17+ yn yr Apple App Store ar gais Apple. Dywedodd Apple fod y radd oedran uwch yn angenrheidiol i adlewyrchu'r defnydd o iaith dramgwyddus a thrais realistig sydd i’w weld mewn rhai gemau a ddefnyddir ar y platfform. Fodd bynnag, mae Google Play yn dal i raddio'r cynnwys ar Discord fel 'Teen'. Er gwaethaf y radd 17+ yn yr Apple App Store, mae telerau gwasanaeth Discord yn caniatáu i ddefnyddwyr gofrestru ar gyfer yr ap os ydynt dros 13 oed.
Dysgwch fwy am sgoriau oedran yn ein 'canllaw i rieni a gofalwyr ar sgoriau oedran mewn apiau a gemau’.
Sut mae plant a phobl ifanc yn defnyddio'r ap
Mae Discord yn gwerthu ei hun fel “a place that makes it easy to talk every day and hang out more often”. Mae'n cefnogi sawl math o gyfathrebu, gan gynnwys galwadau fideo, sgwrsio llais a thestun fel bod gan ddefnyddwyr nifer o ffyrdd o gysylltu. Mae'n arbennig o boblogaidd ymhlith pobl ifanc sy'n ei ddefnyddio i gysylltu â ffrindiau a rhannu eu profiadau o'u hoff gemau. Mae cymuned Discord yn gwneud chwarae gêm yn fwy rhyngweithiol a chymdeithasol i bobl ifanc, yn enwedig i'r rheini sy'n tueddu i chwarae gemau chwaraewr sengl neu os nad oes ganddyn nhw ffrindiau i chwarae gyda nhw wyneb yn wyneb.
Nodweddion a therminoleg allweddol
Risgiau posibl
Cynnwys
Argymhellir bod rhieni a gofalwyr yn cydnabod y sgôr oedran hyn o 17+ a ddefnyddir gan yr Apple App Store. Yn aml bydd defnyddwyr ar y platfform yn trafod gemau sydd â sgôr oedran uwch na 13 ac felly mae defnyddwyr yn agored i gynnwys mwy aeddfed. Mae gan yr ap nodwedd 'Keep me safe', sy'n sganio negeseuon uniongyrchol gan bawb ar gyfer cynnwys cyfryngau anweddus. Fodd bynnag, mae'n hawdd i ddefnyddwyr analluogi'r nodwedd hon. Hefyd, mae defnyddwyr o dan 18 oed yn gallu cael mynediad hawdd at y gweinydd NSFW trwy glicio 'OK' ar ôl derbyn neges yn rhybuddio nad yw'n addas ar gyfer defnyddwyr o dan 18 oed. Os ydych chi’n dewis caniatáu i'ch plentyn ddefnyddio'r ap Discord, mae'n werth darganfod pa gemau maen nhw’n eu trafod ac archwilio sgôr oedran y gemau hyn trwy wefan PEGI. Byddai hyn yn rhoi gwell syniad o'r mathau o gynnwys gemau y byddai defnyddwyr yn ei weld a’i drafod.
Yn yr un modd ag apiau sgwrsio eraill, bydd yn bosib hefyd y bydd eich plentyn yn dod i gysylltiad â chynnwys amhriodol ar ffurf iaith anweddus mewn sgyrsiau. Trwy gyfyngu ar bwy y gall eich plentyn gysylltu â nhw ar y platfform, bydd eich plentyn yn llai tebygol o brofi iaith neu ymddygiad nad yw'n addas i'w oedran. Fodd bynnag, dylid cydnabod ei bod yn bosib o hyd i’ch plentyn weld cynnwys amhriodol drwy’r cysylltiadau sydd ganddo.
Hefyd, mae perygl i’ch plentyn weld cynnwys a all beri gofid neu ddryswch ar ‘Activties’ Discord, sef gemau seiliedig ar ap. Mae rhai gemau fel ’Death by AI’ neu ’Gartic Phone’, yn caniatáu i ddefnyddwyr ysgrifennu eu hymatebion eu hunain i awgrymiadau neu gwestiynau gan AI neu ddefnyddiwr arall. Nid yw awgrymiadau ac ymatebion wedi’u creu gan ddefnyddwyr yn cael eu hidlo, sy’n golygu bod defnyddwyr yn gallu cynnwys cyfeiriadau treisgar neu anweddus o rywiol yn eu hawgrymiadau ac ymatebion. Felly, dim ond gyda chysylltiadau hysbys y dylai’ch plentyn chwarae’r rhain. Hefyd, gofalwch bod eich plentyn yn gwybod y gall siarad â chi os yw’n dod ar draws unrhyw gynnwys sy’n peri gofid neu ddryswch.
Cysylltu ag eraill
Mae Discord yn argymell y dylai defnyddwyr fod yn 13 oed o leiaf i ddefnyddio'r platfform, ond nid yw'n cynnig unrhyw osodiadau preifatrwydd cadarn sy'n golygu bod y cyfrif yn breifat. Mae hyn yn golygu bod unrhyw ddefnyddwyr ar y platfform yn gallu gweld proffil defnyddwyr eraill a chysylltu â nhw. O fewn ap Discord, gall defnyddwyr ryngweithio un i un neu mewn sgyrsiau grwp gyda naill ai pobl y maent yn eu hadnabod neu ddieithriaid. Os bydd dieithryn yn anfon neges at eich plentyn am y tro cyntaf, bydd eich plentyn yn derbyn ‘Safety Alert’ sy’n rhoi cyngor ymarferol ar sut i ymdrin â’r sefyllfa a hefyd yn ei gwneud hi’n haws iddo flocio neu riportio defnyddiwr yn gyflym. Ond, argymhellir mai dim ond pobl maen nhw’n eu hadnabod yn y byd all-lein y dylai pobl ifanc sgwrsio â nhw.
Bydd hyn yn helpu i gyfyngu ar y tebygolrwydd o fod yn agored i gynnwys amhriodol. Dylai defnyddwyr iau ddefnyddio'r gosodiadau ‘Privacy and safety' i reoli ceisiadau gan ffrindiau. Os yw'ch plentyn yn defnyddio'r ap mewn gweinydd cyhoeddus (gofod sgwrsio o fewn y gêm), fe'ch cynghorir i'w oruchwylio er mwyn sefydlu'r mathau o gysylltiadau mae'n ymwneud â nhw. Siaradwch â'ch plentyn am y risgiau o sgwrsio â dieithriaid ac eglurwch bwysigrwydd peidio â rhannu unrhyw wybodaeth bersonol neu adnabyddadwy â defnyddwyr eraill mewn sgyrsiau. Anogwch eich plentyn i ddweud wrthych chi os oes rhywun wedi gofyn cwestiynau personol iddo neu i sgwrsio'n breifat.
Dylai rhieni nodi bod Discord wedi newid eu system adrodd yn llwyr yn ddiweddar fel bod pob adroddiad yn cael ei ymchwilio'n unigol i sicrhau canlyniadau priodol i ddefnyddwyr sy'n camddefnyddio'r platfform. Mae hyn bellach yn golygu y gall defnyddwyr barhau i ddefnyddio'r ap, er ei fod mewn capasiti cyfyngedig, hyd yn oed ar ôl cael eu hadrodd. Sicrhewch fod unrhyw gyfrifon yr ydych chi neu'ch plentyn yn adrodd amdanyn nhw hefyd wedi'u blocio i helpu i gyfyngu ar y cyswllt sydd gan eich plentyn â defnyddwyr nad ydyn nhw'n eu hadnabod neu sy'n eu gwneud yn anghyfforddus.
Ymddygiad defnyddwyr
Os oes gan eich plentyn gyfrif Discord, mae'n bwysig eich bod chi a'ch plentyn yn ymwybodol o'r hyn mae'n ei rannu a'r effaith fydd hyn yn ei chael ar ei ôl troed digidol. Siaradwch â'ch plentyn i'w helpu i ddeall beth sy'n briodol a beth sydd ddim yn briodol iddo ei rannu a'i annog i rannu gyda'i ffrindiau yn unig. Sicrhewch fod eich plentyn yn gwybod y gall fod yn anodd cadw perchnogaeth ar unrhyw gynnwys ar ôl iddo gael ei rannu ar-lein, oherwydd mae'n hawdd copïo ac ailbostio cynnwys heb yn wybod iddo ac yna gall ddod yn anodd ei dynnu oddi ar y rhyngrwyd.
Os yw defnyddiwr yn torri canllawiau cymuned Discord, bydd yn derbyn rhybudd gan system rybuddio Discord. Mae’r system hon yn dweud wrth ddefnyddiwr ei fod wedi torri rheolau Discord, pa gamau mae Discord wedi’u cymryd, a sut fydd hynny’n effeithio ar statws ei gyfrif ar Discord. Mae sawl statws (‘standing’) yn bosibl, yn amrywio o ‘all good’ i ‘permanent suspension’, sy’n seiliedig ar nifer y toramodau a pha mor ddifrifol ydyn nhw. Ni fydd cyfrif sydd wedi’i atal yn barhaol yn gallu defnyddio Discord mwyach. Dylech siarad â’ch plentyn am bwysigrwydd dilyn canllawiau cymuned Discord er mwyn sicrhau bod statws ei gyfrif yn parhau’n dda.
Dyluniad, data a chostau
Gall Discord fod yn eithriadol o boblogaidd gyda phobl ifanc sydd wrth eu bodd yn chwarae gemau. Fel chwarae gêm ei hun, gall gwylio eraill yn chwarae gêm a sgwrsio gyda nhw fod yn brofiad hynod apelgar i bobl ifanc, felly efallai y bydd angen gosod cyfyngiadau i'w hatal rhag treulio oriau maith yn sgwrsio.
Mae sawl cyfle i ddefnyddwyr brynu eitemau yn yr ap ar Discord. Gall defnyddwyr uwchraddio i danysgrifiad premiwm o'r enw Nitro yn ogystal â phrynu ‘server boosts’. Siaradwch â'ch plentyn am brynu eitemau yn yr ap gan sicrhau ei fod yn deall bod arian go iawn yn cael ei ddefnyddio i brynu eitemau yn yr ap. Mae'r rhan fwyaf o ddyfeisiau clyfar a chyfrifiaduron yn caniatáu i ddefnyddwyr sefydlu gosodiadau prynu yn yr ap yn eu dewislen prif osodiadau. Hefyd, mae'n bwysig sicrhau nad yw'r ap yn gysylltiedig â'ch cardiau banc na'ch manylion ariannol.
Awgrymiadau ar gyfer cadw’ch plentyn yn ddiogel
Cyngor cyffredinol
Mae Discord wedi datblygu ei ganolfan ddiogelwch ddynodedig ei hun i roi mwy o wybodaeth i ddefnyddwyr am sut i gadw eu hunain yn ddiogel wrth ddefnyddio'r ap. Mae’r llyfrgell diogelwch yn cynnwys adnoddau defnyddiol penodol i blant a rhieni.
Mae Discord wedi cyhoeddi Teen Safety Charter gyda gwybodaeth am ymddygiad derbyniol ar Discord a gwybodaeth am offer diogelwch penodol i blant.
Mae Discord wedi cynhyrchu tudalen ganllaw ar gyfer rhieni a gofalwyr i’w helpu i siarad am ddiogelwch ar-lein gyda’u plant. Mae ‘Parent Hub’ ar gael hefyd, lle gall rhieni a gofalwyr ddysgu mwy am sut mae eu plentyn yn defnyddio Discord a rhai o’r gosodiadau sydd ar waith i ddiogelu defnyddwyr iau ar y platfform.
Mae Discord wedi lansio gwasanaeth ‘find a helpline’ lle gall defnyddwyr ddod o hyd i gymorth cyfrinachol, rhad ac am ddim, yn eu gwlad.