Aflonyddu rhywiol ar-lein

Yr hyn sydd angen i chi ei wybod

Aflonyddu rhywiol ar-lein yw ymddygiad rhywiol digroeso ar unrhyw blatfform digidol. Gall aflonyddu rhywiol ar-lein gynnwys amrywiaeth o ymddygiadau sy’n defnyddio sylwadau, negeseuon, ffotograffau neu fideos.

Gall aflonyddu fod yn gyhoeddus neu’n breifat. Gellir camddefnyddio technolegau AI cynhyrchiol, fel ffugiad dwfn, i greu cynnwys niweidiol neu fygythiol, fel delwedd rywiol neu fideo o rywun.

Gall plant a phobl ifanc fod yn ddioddefwyr ymddygiad ar-lein annerbyniol, sy’n gallu gwneud iddynt deimlo dan fygythiad, yn ofidus, wedi’u rhywioli, ecsbloetio, gorfodi, sarhau neu eu bod yn destun achos o wahaniaethu.

Mae beio’r dioddefwr yn parhau i fod yn broblem amlwg gydag aflonyddu rhywiol ar-lein a gall hyn greu rhwystrau sy’n atal pobl rhag datgelu neu gael cymorth. Mae’n bwysig bod plant a phobl ifanc yn deall pwysigrwydd agweddau iach sy’n dangos parch ar-lein a’u bod yn cael eu grymuso i herio pob math o gamdriniaeth ar-lein yn ddiogel a chael cymorth os oes angen.