Spotify

Gwasanaeth ffrydio cerddoriaeth digidol a phodlediadau sy'n rhoi mynediad i lyfrgell ar-lein o gynnwys hawlfraint-gyfyngedig drwy chwaraewr gwe neu ap. Gall cerddoriaeth a chynnwys sain gael eu dewis gan y defnyddiwr neu ei greu gan algorithm cymhleth Spotify sy'n argymell cynnwys sy'n seiliedig ar hanes gwrando'r defnyddiwr. Mae fersiwn sylfaenol o Spotify a gefnogir gan hysbysebion, ar gael yn rhad ac am ddim a chynigir fersiwn premiwm gyda nodweddion ychwanegol trwy danysgrifiad misol am dâl. Mae Spotify ar gael ar gyfrifiaduron Windows, MacOS a Linux, dyfeisiau symudol iOS ac Android, chwaraewyr cyfryngau digidol a dyfeisiau cartref clyfar fel Amazon Echo a Google Nest.

Roedd gan Spotify 456 miliwn o ddefnyddwyr gweithredol bob mis, yn cynnwys 195 miliwn o danysgrifwyr premiwm a 240 miliwn o ddefnyddwyr y gwasanaeth am ddim. Mae hyn yn golygu mai Spotify yw'r gwasanaeth ffrydio sain mwyaf.

Sgôr oedran swyddogol

Y cyfyngiad oedran isaf ar gyfer defnyddwyr Spotify yw 13 oed, ond does dim dulliau trylwyr o ddilysu oedran.

Mae'n ofynnol i ddefnyddwyr dan 18 oed gael caniatâd rhiant i ddefnyddio'r ap.

Mae ein 'Canllaw i rieni a gofalwyr ar sgoriau oedran mewn apiau a gemau’ yn cynnwys rhagor o fanylion am hyn.

Sut mae pobl ifanc yn defnyddio'r ap

Mae Spotify yn rhoi mynediad i lyfrgell ar-lein enfawr sy'n parhau i dyfu gyda chynnwys newydd yn cael ei ychwanegu'n barhaus. Prif ddefnyddiau Spotify yw chwilio am gerddoriaeth benodol a'i chwarae ar alw a chael y wybodaeth ddiweddaraf am gerddoriaeth newydd. Mae defnyddwyr yn gallu hoffi neu gasáu cynnwys y credant ei fod yn dda neu'n ddrwg er mwyn personoli eu profiad trwy hyfforddi algorithm Spotify i ganfod rhagor o gynnwys yn seiliedig ar eu harferion gwrando.

Mae'r fersiwn tanysgrifio premiwm yn caniatáu i ddefnyddwyr wrando ar eu hoff gynnwys cerddoriaeth a sain, creu a rhannu rhestri chwarae, dilyn rhestri chwarae wedi'u curadu gan ddefnyddwyr eraill ac uwchlwytho cynnwys nad yw ar gael yng nghatalog Spotify.

Mae rhannu cynnwys â ffrindiau yn agwedd boblogaidd ar Spotify ymhlith phobl ifanc. Gall defnyddwyr Spotify ddilyn defnyddwyr eraill neu wneud eu harferion gwrando eu hunain yn weladwy i ddefnyddwyr sy'n eu dilyn. Mae'r nodwedd 'Friend Activity' yn caniatáu i ddefnyddwyr ddangos i'w gilydd beth maen nhw'n ei chwarae yn Spotify mewn amser real er mwyn creu profiad gwrando a rennir. Gellir ychwanegu ffrindiau’n unigol gan ddefnyddio enw defnyddiwr Spotify neu drwy gysylltu cyfrif Spotify y defnyddiwr gyda'i gyfrif Facebook er mwyn cael gafael ar restr ffrindiau Facebook. Mae modd creu rhestri chwarae ar y cyd drwy ganiatáu i ffrindiau gyfrannu cynnwys ac mae hefyd yn bosib eu creu drwy gyfuno chwaeth gerddorol hyd at ddeg o ddefnyddwyr drwy wahoddiad.

Yn ogystal â rhannu cynnwys trwy ddefnyddio botwm 'Share' yr ap, gellir rhannu rhestri chwarae a thraciau unigol trwy anfon neges destun, e-bost, cyfryngau cymdeithasol neu drwy gopïo a gludo'r ddolen rhestr chwarae neu’r trac. Hefyd, mae Spotify yn caniatáu i gerddorion ac artistiaid cerddorol ychwanegu eu cynnwys eu hunain at lyfrgell Spotify a hyrwyddo eu gwaith.

“Rwy'n hoffi'r gerddoriaeth y mae'n ei darparu a'r opsiwn i wrando ar unrhyw beth. Rwy'n hoffi podlediadau yma hefyd. Mae yna lawer o rai da sy'n rhad ac am ddim.”, plentyn, 14 oed.

Nodweddion allweddol a therminoleg

Nodwedd allweddol Spotify yw chwarae cerddoriaeth a chynnwys sain o'r catalog ar-lein.

Risgiau posibl

Cynnwys

Mae'n anochel bod catalog enfawr Spotify o gerddoriaeth a phodlediadau’n cynnwys rhywfaint o gynnwys anweddus ar ffurf geiriau caneuon a sgyrsiau addas i oedolion. Mae cynnwys a nodwyd gan Spotify fel addas i ddefnyddwyr dros 18 oed yn cael ei farcio gyda label 'Explicit content' neu 'E. Mae fersiwn danysgrifio arall o'r enw 'Spotify Kids' ar gael i blant deuddeg oed ac iau, ac wedi'i churadu gan Spotify i gynnwys caneuon addas i blant yn unig. Mae Spotify yn defnyddio delweddau hefyd i nodi caneuon, albymau, artistiaid, rhestri chwarae, podlediadau a phroffiliau, rhai ohonynt yn anaddas i blant o bosib. Mae Spotify yn cynnwys podlediadau fideo yn ogystal â sain, a allai gynnwys lluniau ac iaith anaddas. Ychwanegiad diweddar i Spotify yw 'Canvas', nodwedd sy'n disodli celf albwm gyda chlip fideo byr parhaus. Efallai na fydd rhai o'r clipiau fideo hyn yn addas i blant. Bydd plant sy'n defnyddio'r fersiwn rhad ac am ddim o Spotify sy'n cael ei hariannu gan hysbysebion yn gweld hysbysebion, gyda’r rhan fwyaf ohonynt wedi'u bwriadu ar gyfer oedolion.

Y prif risg i blant sy'n defnyddio Spotify yw clywed cerddoriaeth, a podlediadau, a llyfrau sain amhriodol o ran oedran, yn enwedig rhegi ac iaith a themâu sy'n fwy addas i oedolion. Defnyddio'r hidlydd 'explicit content' mewn gosodiadau yn cyfyngu ar y rhan fwyaf o’r cynnwys sy’n anaddas i blant, ond nid pob y cyfan. Er enghraifft, efallai na fydd deiliad yr hawliau’n riportio pob cynnwys anweddus, felly ni fydd y cynnwys yn cael ei dagio a bydd yn chwarae hyd yn oed pan fydd yr hidlydd ar waith. Hefyd, bydd cerddoriaeth a phodlediadau gyda theitlau penodol a/neu gelf clawr yn parhau i ymddangos mewn rhestri chwilio, hyd yn oed os yw'r hidlydd yn atal y cynnwys rhag cael ei chwarae. Mae gan ddefnyddwyr yr opsiwn i eithrio rhestrau chwarae penodol o'u 'Taste Profiles’.

Cysylltu ag eraill

Nid platfform cyfryngau cymdeithasol yw Spotify a does dim elfen negeseua na sgwrsio iddo. Fodd bynnag, mae rhai defnyddwyr Spotify wedi defnyddio meysydd celf clawr, enw a disgrifiad o restri chwarae i gyfathrebu â dilynwyr mewn ffordd a all fod yn agored i'w cham-drin. Cafwyd adroddiadau o ddefnyddwyr yn cael eu gwthio neu eu gorfodi i rannu cynnwys amhriodol fel hyn. Cynghorir y dylai eich plentyn gadw rhestrau chwarae yn breifat, a'ch bod yn holi eich plentyn o dro i dro am ei restrau chwarae. Dywedwch nad yw hyn yn amharu ar breifatrwydd, ond yn ffordd o helpu eich plentyn i gadw'n ddiogel.

Gall defnyddwyr gysylltu gan ddefnyddio’r 'Friend activity' hefyd sy'n caniatáu i ddefnyddwyr ddilyn ei gilydd a gweld pa gerddoriaeth neu gynnwys sain maen nhw'n ei chwarae mewn amser real. Mae modd cysylltu cyfrifon Spotify a Facebook er mwyn hwyluso'r broses o ychwanegu ffrindiau. Pan fydd wedi'i gysylltu â Facebook, bydd proffil Spotify yn dangos enw go iawn y defnyddiwr a llun Facebook. Mae modd creu rhestri chwarae ar y cyd drwy ganiatáu i ffrindiau gyfrannu cynnwys ac mae Spotify yn cynnig yr opsiwn i greu cyfuniadau o chwaeth gerddorol hyd at ddeg defnyddiwr a chreu rhestr chwarae iddyn nhw. Nid yw'r swyddogaethau cyswllt 'Friend activity' a Facebook yn niweidiol yn eu hanfod ond gallant arwain at ddilyn ac efallai cysylltu â defnyddwyr Spotify y tu allan i'r ap. Argymhellir bod eich plentyn yn cadw ei restr chwarae'n breifat.

Ymddygiad defnyddwyr

Mae gan Spotify 'Platform rules' sy'n rhoi arweiniad i weithgarwch ac ymddygiad  na chaiff eu caniatáu na'u derbyn gan Spotify. Er enghraifft, mae'r 'Platform rules' yn ymdrin â chynnwys peryglus, twyllodrus, sensitif ac anghyfreithlon ac yn dweud y gall diffyg cydymffurfio â'r rheolau arwain at gael gwared ar y cynnwys ac atal neu derfynu cyfrifon.

Dyluniad, data a chostau

Mae Spotify yn rhad ac am ddim i'w lawrlwytho a'i osod ar bob platfform ac mae'r fersiwn a gefnogir gan hysbysebion am ddim i'w defnyddio. Fersiwn talu o'r gwasanaeth yw Spotify 'Premium' sydd ar gael fel tanysgrifiad unigol neu a rennir. Ymhlith yr opsiynau eraill mae'r cynllun 'duo' ar gyfer dau ddefnyddiwr ar yr un aelwyd, cynllun teulu ar gyfer hyd at chwe defnyddiwr ar yr un aelwyd a chynllun personol gostyngol i fyfyrwyr. Dim ond cynlluniau 'Premium' sy'n darparu rheolaethau rhieni, gan gynnwys yr hidlydd cynnwys anaddas. Mae Spotify yn wasanaeth ffrydio sy'n talu artistiaid drwy hysbysebu ar y gwasanaeth am ddim neu refeniw a gynhyrchir gan gynlluniau tanysgrifio, ac nid yw'n cefnogi prynu cynnwys unigol.

Ac eithrio'r tanysgrifiad misol taledig, yr unig gost am ddefnyddio Spotify yw data, gyda 1GB o ddefnydd data yn darparu rhyw 23 awr o chwarae cerddoriaeth yn ansawdd sain 'Normal' rhagosodedig 96kbps. Bydd gwella ansawdd y sain i 'uchel' neu 'uchel iawn' yn cynyddu'r defnydd o ddata. Mae Spotify hefyd wedi creu partneriaethau gyda phlatfformau cyfryngau cymdeithasol fel Snapchat, TikTok, a Roblox fel bod defnyddwyr yn gallu canfod a gwrando ar ganeuon maen nhw’n dod o hyd iddyn nhw ar y platfformau hynny.

Sut i gadw'ch plentyn yn ddiogel

Awgrymiadau cyffredinol

Mae gosodiadau Spotify mewn cyfrifon 'Premium' yn caniatáu i rieni a gofalwyr gyfyngu ar gynnwys anaddas, ond y ffordd hawsaf i gadw plant yn ddiogel wrth ddefnyddio Spotify yw creu cyfrif 'Spotify Kids' fel rhan o danysgrifiad teuluol premiwm. Mae cynllun teuluol yn caniatáu i chi greu hyd at bum proffil plentyn ac mae modd lawrlwytho'r ap heb hysbysebion i gymaint o ddyfeisiau ag yr hoffech. Mae'r ap yn darparu hwiangerddi, straeon amser gwely, caneuon i blant a llawer mwy i blant iau, a chaneuon pop, teledu a ffilmiau, straeon amser gwely, cerddoriaeth gefndirol ar gyfer gemau cyfrifiadurol a gwaith cartref i blant hyn, oll wedi'u curadu gan Spotify. ‘Mae 'Spotify kids' yn caniatáu i oedolion weld a rheoli'r cynnwys y mae'r plentyn yn ei gyrchu trwy ddefnyddio'r nodwedd rheolaethau rhieni hefyd.

Mae gan Spotify ganolfan breifatrwydd ddynodedig lle mae defnyddwyr yn gallu dysgu mwy am eu preifatrwydd ar yr ap a sut mae eu data yn cael ei ddefnyddio.

Mae Spotify wedi creu canllaw byr i Spotify ar gyfer rhieni a gofalwyr a Safety and Privacy Centre, sy’n amlinellu sut i gadw plant a phobl ifanc yn ddiogel ar y platfform.

Mae gan Spotify restr o adnoddau iechyd meddwl y gall defnyddwyr eu defnyddio. Mae'r rhestr wedi'i rhannu yn ôl gwlad ac mae'n cynnwys adnoddau amrywiol ar gyfer y DU. Mae adnoddau ar gael ar gyfer pynciau gan gynnwys Iechyd Meddwl, Dod Allan a Hunaniaeth, Trais a Cham-drin Domestig, Camddefnyddio Cyffuriau ac Alcohol, Anhwylderau Bwyta a Thrais Rhywiol.