Call of Duty

Sut mae Call of Duty: Mobile yn gweithio

Gêm ymladd aml-chwaraewr person cyntaf yw Call of Duty (COD): Mobile. Gellir ei chwarae ar ddyfeisiau iOS ac Android a thrwy borwr gwe. Mae chwaraewyr yn cystadlu yn erbyn chwaraewyr eraill ar-lein gan ddefnyddio arfau milwrol realistig i gwblhau cyrchoedd. Gall gemau gael eu chwarae’n unigol neu mewn timau gyda ffrindiau neu bobl ddieithr.

Mae’r gêm hefyd yn adrodd stori o safbwynt person cyntaf sy’n gwneud y gêm yn realistig ac yn galluogi chwaraewyr i ymddwyn fel pobl filwrol sydd â grym.

Oedran isaf gofynnol

Mae gan COD: Mobile sgôr PEGI 18 i oedolion gan ei fod yn gêm hynod dreisgar. Yn aml, gall olygu lladd heb gymhelliad neu drais tuag at gymeriadau diamddiffyn.

Gofynnir i chwaraewyr roi eu dyddiad geni wrth greu cyfrif, ond nid yw eu hoedran yn cael ei wirio. Mae hyn yn golygu y gallai defnyddwyr iau ddweud celwydd am eu hoed i chwarae.

Nodweddion

Arsenal

Mae hyn yn galluogi chwaraewyr i addasu ac uwchraddio eu harfau.

Battle Passes

Mae’r rhain yn rhoi cyfle i chwaraewyr gael cynnwys ychwanegol a chyfleoedd i gynyddu eu lefel. Gall chwaraewyr gael Battle Passes am ddim trwy gwblhau heriau neu lefelau, neu drwy eu prynu ag arian go iawn. Mae Battle Passes â thâl yn rhoi cyfle i chwaraewyr gael cynnwys unigryw nad yw ar gael i chwaraewyr eraill.

Battle Royale

Mae’r modd hwn yn caniatáu i hyd at 100 o chwaraewyr frwydro nes bydd un ohonynt yn fuddugol.

Challenges

Mae’r rhain yn nodweddion o’r gêm sy’n newid yn ddyddiol ac yn wythnosol. Maent yn gwobrwyo chwaraewyr am gyflawni ystadegau penodol.

Chat

Mae’r cyfleuster sgwrsio’n galluogi chwaraewyr i gyfathrebu â’i gilydd. Gellir gwneud hyn mewn 3 ffordd:

‘World’ (sy’n gyhoeddus).
Gyda ffrindiau (‘Friends’).
Mewn ‘Clan’ (tîm y chwaraewr).

Clan

Grŵp o chwaraewyr sy’n ymuno i gwblhau tasgau a chyrchoedd gyda’i gilydd yw ‘Clan’. Gall claniau gynnwys chwaraewyr sy’n adnabod ei gilydd ond hefyd chwaraewyr nad ydynt yn adnabod ei gilydd.

KillStreak

System wobrwyo yn y gêm. Sgoriau yw ‘Killstreaks’ sy’n cael eu rhoi i chwaraewyr ar gyfer y nifer o weithiau yn olynol y maent yn lladd chwaraewyr eraill cyn cael eu lladd eu hunain.

Loadout

Mae hyn yn rhoi amser i chwaraewyr ddewis eu manteision, arfau a’u ‘operator skill’ cyn ymuno â gêm.

Operator Skills

Sgiliau ac arfau arbennig, gwell y gellir eu defnyddio i adennill meistrolaeth ar adegau penodol yn ystod y gêm.

Scorestreak

‘Scorestreaks’ yw’r gwobrau mae chwaraewyr yn eu hennill am chwarae’n dda. Gallant gynnwys arfau neu sgiliau i’w helpu i symud ymlaen. Gall defnyddwyr ennill ‘scorestreaks’ neu eu prynu yn y gêm.

Rheoli risgiau

Cynnwys amhriodol

Mae gan COD: Mobile gynnwys sy’n amhriodol i ddefnyddwyr dan 18 oed. Mae animeiddiad y gêm yn realistig ac yn cynnwys gwaed yn tasgu pan fydd chwaraewyr yn cael eu lladd.

Os yw’ch plentyn yn chwarae COD: Mobile, siaradwch â nhw am y cynnwys y maent yn ei weld yn y gêm. Gofynnwch sut mae’r trais yn gwneud iddynt deimlo a thynnwch sylw at unrhyw drais sy’n cael ei ogoneddu. Dywedwch wrthynt y gallant ddod atoch chi am gefnogaeth os oes unrhyw gynnwys yn peri gofid iddynt.

Cysylltiad â chwaraewyr eraill

Mae’r gêm hon wedi’i llunio i’w chwarae fel gêm aml-chwaraewr gyda ffrindiau neu bobl ddieithr ar-lein. Gall chwaraewyr ddod i gysylltiad ag iaith neu gynnwys amhriodol trwy ryngweithio â chwaraewyr yn fyw a thrwy’r cyfleusterau sgwrsio.

Gall y camau canlynol helpu lleihau'r risgiau sy'n gysylltiedig â chysylltiad â chwaraewyr eraill.

Osgoi chwarae gyda phobl ddieithr

Anogwch eich plentyn i chwarae gyda ffrindiau maent yn eu hadnabod ac yn ymddiried ynddynt mewn bywyd go iawn yn unig.

Siarad am ryngweithiadau ar-lein

Sgwrsiwch am fywyd ar-lein eich plentyn i’ch helpu i ddysgu a ydynt yn rhyngweithio â phobl ddieithr. Addysgwch nhw am ba wybodaeth y mae’n iawn ei rhannu at-lein i’w hatal rhag rhannu gormod a diogelu eu preifatrwydd.

Mae rhai chwaraewyr yn defnyddio apiau sgwrsio trydydd parti, fel Discord, i sgwrsio wrth chwarae gemau, felly gofynnwch pa blatfformau maent yn eu defnyddio. Gwnewch yn glir y gallant ddod atoch chi am gefnogaeth bob amser.

Offerynnau tawelu a riportio

Grymuswch eich plentyn i ddefnyddio’r offerynnau tawelu a riportio i ddod â chysylltiad â chwaraewyr sy’n eu gwneud yn anghyfforddus i ben.

Gormod o amser o flaen sgrin

Gall chwaraewyr deimlo dan bwysau i ddal ati i chwarae pan fyddant yn cwblhau cyrchoedd mewn tîm. Mae yna hefyd ddigwyddiadau cyfyngedig, neu ‘Limited-time events’, a all annog rhai chwaraewyr i dreulio mwy o amser ar y platfform er mwyn ceisio cwblhau cyrch tra mae ar gael.

Gall y camau hyn helpu eich plentyn i reoli eu hamser ar y platfform.

Rheolyddion amser sgrin

Mae gan ddyfeisiau Android ac iOS offerynnau amser sgrin gosodedig sy’n eich galluogi i osod terfyn ar ba mor hir y gall eich plentyn chwarae’r gêm bob dydd.

Cytuno ar derfynau

Dewch i gytundeb â’ch plentyn ynghylch pryd a ble y gallant chwarae COD: Mobile.

Gosodiadau i ddiogelu’ch plentyn

Os byddwch yn dewis caniatáu i’ch plentyn chwarae COD: Mobile, gall y gosodiadau hyn eu helpu i gadw’n ddiogel.

Rheoli preifatrwydd

Gosod cyfrif i ‘Private’ (ar iOS)

Ewch i ‘Game Centre’ yn y ddewislen gosodiadau.
Ewch i ‘Privacy and settings’.
Newidiwch ‘Profile privacy’ i ‘Only you’.

Gosod cyfrif i ‘Private’ (ar Android)

Ewch i’r ap ‘Play games’.
Dewiswch eicon y ddewislen.
Dewiswch ‘Settings’.
Dewiswch ‘Game profile’.
Dewiswch ‘Play now’.
Dewiswch ‘Your game profile’.
Newidiwch eich gosodiadau ‘Visibility and notifications’ i’r opsiynau mwyaf preifat.

Offerynnau tawelu a riportio

Tawelu chwaraewr

Pan fyddwch yn y gêm, dewiswch eicon y seinydd ar yr ochr dde.
Dewiswch y chwaraewr o’r rhestr.
Dewiswch y seinydd wrth ochr ei enw (bydd hyn yn ei dawelu am hyd y gêm).

Riportio chwaraewr

Dewiswch lun proffil y cyfrif rydych chi’n ei ddefnyddio.
Ewch i ‘Player history’ (eicon y stopwatsh).
Dewiswch eicon y parasiwt i riportio chwaraewr.
Dewiswch y chwaraewr yr hoffech eu riportio a dewiswch eicon yr ebychnod (!).
Amlygwch y chwaraewr a dewiswch y math priodol o adroddiad o’r rhestr.
Dewiswch ‘Report’.