Minecraft Education

Sut i gael gafael ar Minecraft Education

Gallwch lawrlwytho Minecraft Education o wefan Minecraft Education. Mae ar gael ar gyfer dyfeisiau Windows, MacOS ac iPad. Mae angen i chi ei lawrlwytho ar y dyfeisiau rydych chi'n bwriadu eu defnyddio gyda'ch dysgwyr. 

Rydym yn argymell y dylech ddefnyddio Windows Desktop neu MacOS gan y bydd hyn yn eich galluogi i ddefnyddio'r ap Modd Ystafell Ddosbarth.

Bydoedd ac adnoddau Minecraft

Mae adnoddau Cyfoethogi’r Cwricwlwm i Gymru Minecraft Education ar gael.

Mae adnoddau tîm Minecraft Education ar gael.

Modd Ystafell Ddosbarth

Er mwyn rheoli gosodiadau ar gyfer eich dysgwyr o ryngwyneb defnyddwyr canolog yn Minecraft Education, mae angen i chi lawrlwytho’r Modd Ystafell Ddosbarth. Gallwch ddod o hyd i ganllaw manwl ar osod a defnyddio’r Modd Ystafell Ddosbarth  yn Hyb Cymunedol Minecraft Education.

Cadw Cymru: pontio treftadaeth Cymru a dysgu digidol

Ynglŷn â Cadw Cymru

Cynnyrch addysgol arloesol yw Cadw Cymru sy’n cyfuno Minecraft gyda safleoedd hanesyddol Cymru. Mae’n offeryn cyffrous i ymarferwyr yng Nghymru ei ddefnyddio i ennyn diddordeb dysgwyr yn eu hanes cenedlaethol mewn ffordd ryngweithiol ac ymdrochol.

Wedi’i datblygu gyda haneswyr, ymarferwyr a dylunwyr digidol, mae’r rhaglen yn ail-greu safleoedd treftadaeth eiconig Cymru o fewn Minecraft Education. Mae’r lleoliadau rhithwir hyn yn caniatáu i ddysgwyr archwilio a dysgu am dirnodau hanesyddol, fel cestyll, abatai ac adfeilion hynafol.

Mae’r enw ‘Cadw’ yn adlewyrchu cenhadaeth y prosiect i warchod a hyrwyddo treftadaeth Cymru. Drwy ddefnyddio Minecraft, mae Cadw Cymru yn darparu llwyfan cyfarwydd a chyffrous i feithrin ymdeimlad dwfn o gynefin ac ymgysylltiad addysgol.

Mae Byd Minecraft Cadw Cymru ar gael yn Gymraeg am y tro cyntaf. Mae’n cynnwys pecyn adnoddau arloesol sy’n trawsnewid holl brofiad Minecraft Education yn antur mae’r defnyddiwr yn cael ei drochi’n llawn ynddi yn y Gymraeg.

Mae hyn yn sicrhau bod dysgwyr Cymraeg eu hiaith yn gallu llywio drwy’r gêm a’i harchwilio yn gyfan gwbl drwy gyfrwng y Gymraeg.

Sut mae’n gweithio

Gall ymarferwyr lawrlwytho map Byd Minecraft Cadw Cymru a chanllaw i ymarferwyr Byd Minecraft Cadw Cymru o’r ardal ‘Adnoddau’ ar Hwb.

Gall dysgwyr fynd i mewn i fyd Cadw Cymru lle bydd Taliesin yn eu gwahodd ar daith. Yna byddant yn mynd i mewn i Galeri, sef y porth i safleoedd Cadw o amgylch Cymru.

Mae safleoedd rhithwir Cadw yn y rhaglen yn caniatáu i ddysgwyr archwilio a rhyngweithio wrth eu pwysau eu hunain. Mae pob safle yn cynnig ei daith rithwir ei hun, sydd yn addysgol ond hefyd yn hwyl. Gall dysgwyr deithio mewn amser i ddod o hyd i’r safleoedd hanesyddol hyn sydd wedi eu hailadeiladu yn Minecraft, gan wneud hanes yn fyw ac yn rhyngweithiol iddynt. 

Bydd gan bob safle ei ganllaw ei hun i ymarferwyr sy’n trafod y teithiau rhithwir. Mae yna hefyd ganllawiau ategol ychwanegol ar gyfer yr ystod o weithgareddau dysgu ‘Cwest’.

Mae natur ryngweithiol Minecraft yn annog cydweithio ymhlith dysgwyr. Gallant weithio gyda’i gilydd i ddatrys posau hanesyddol, cymryd rhan mewn sefyllfaoedd chwarae rôl neu hyd yn oed fynd ati eu hunain i ail-greu’r safleoedd.

Cyd-fynd â’r Cwricwlwm i Gymru

Mae Cadw Cymru yn ategu nodau’r Cwricwlwm i Gymru drwy hyrwyddo datblygiad ystod o sgiliau a chymwyseddau.

Trwy ddefnyddio Cadw Cymru, gall ymarferwyr feithrin sgiliau trawsgwricwlaidd, ac integreiddio llythrennedd, rhifedd a chymhwysedd digidol i wersi hanes. Mae’r rhaglen yn annog dysgu sy’n seiliedig ar ymchwil. Mae’r dull hwn yn cyd-fynd yn dda â phwyslais y cwricwlwm ar ddatblygu dysgwyr annibynnol sy’n gallu gwerthuso gwybodaeth yn feirniadol a gwneud penderfyniadau wedi eu seilio ar wybodaeth.

Taith gyntaf Cadw Cymru

Mae Cadw Cymru yn cael ei lansio gan gyflwyno ei safle cyntaf, Castell Conwy.

Nod y daith rithwir yw eich arwain chi a’ch dysgwyr drwy hanes cyfoethog, rhyfeddod pensaernïol ac arwyddocâd diwylliannol Castell Conwy.

Mae 6 chwest annibynnol yn gysylltiedig â Chastell Conwy. Fel yr ymarferydd, gallwch chi benderfynu pa gwest neu gwestau rydych chi’n mynd arnynt gyda’ch dysgwyr. Mae gan bob cwest ei ganllaw ategol ei hun i ymarferwyr.

Dyfodol Cadw Cymru

Bydd Cadw Cymru yn parhau i ehangu i gynnwys tua 20 o safleoedd Cadw.

Bydd y gyfres o safleoedd yn cael eu cyflwyno dros y flwyddyn nesaf, pob un yn canolbwyntio ar ardal hanesyddol wahanol yng Nghymru. Bydd pob safle yn rhoi cyd-destun hanesyddol ac yn annog meddwl beirniadol a chreadigrwydd trwy amryw o gwestau gafaelgar.

Pecyn adnoddau Minecraft Cymraeg Cadw Cymru

Ynglŷn â’r pecyn adnoddau Cymraeg

Mae pecyn adnoddau Minecraft Cymraeg Cadw Cymru yn becyn adnoddau y gellir ei lawrlwytho ar gyfer Minecraft Education sydd wedi’i gynllunio i drawsnewid sut mae dysgwyr yng Nghymru yn rhyngweithio â Minecraft Education.

Mae’n trawsnewid y profiad cyfan o Minecraft Education yn antur mae’r defnyddiwr yn cael ei drochi’n llawn ynddi yn y Gymraeg am y tro cyntaf. Mae hyn yn sicrhau bod dysgwyr Cymraeg eu hiaith yn gallu llywio drwy’r gêm a’i harchwilio yn gyfan gwbl drwy gyfrwng y Gymraeg.

Mae’r pecyn adnoddau yn offeryn pwerus ar gyfer cadw a hyrwyddo’r diwylliant Cymraeg yn yr ystafell ddosbarth. Wedi’i gynllunio ar gyfer ymarferwyr, mae’n cynnig cyfle unigryw i addysgu yn yr iaith Gymraeg, gan feithrin cysylltiad dwfn â’n treftadaeth ddiwylliannol gyfoethog.

Mae’n cynnig cyfle cyffrous i ymarferwyr yng Nghymru gyfoethogi eu haddysgu gydag offeryn rhyngweithiol sy’n berthnasol yn ddiwylliannol. Trwy integreiddio’r Gymraeg i fyd ymgysylltiol Minecraft Education, gall ymarferwyr:

• wella sgiliau iaith
• meithrin gwerthfawrogiad diwylliannol
• ysgogi dysgwyr drwy brofiadau dysgu arloesol

Mae’r pecyn adnoddau nid yn unig yn gwneud dysgu’n fwy diddorol ond hefyd yn helpu i warchod a hyrwyddo’r iaith a’r diwylliant Cymraeg.

Sut mae’n gweithio

O’r ardal ‘Adnoddau’ ar Hwb, gall ymarferwyr lawrlwytho’r canlynol:

• pecyn adnoddau Cymraeg Minecraft Cadw Cymru
• pecyn adnoddau pecyn croen Cymraeg
• canllaw i ymarferwyr ar gyfer pecyn adnoddau Cymraeg Cadw Cymru

Rhaid gosod y 2 becyn adnoddau a’u rhoi ar waith yn Minecraft Education. Mae camau manwl ar sut i lawrlwytho a gosod y pecynnau wedi’u cynnwys yn y canllaw i ymarferwyr. Mae hefyd yn cynnwys awgrymiadau ac arferion gorau ar gyfer defnyddio’r pecyn yn effeithiol yn yr ystafell ddosbarth.