Cynllun pontio cynradd i uwchradd cyfrwng Cymraeg

Trosolwg

Mae ein strategaeth ar gyfer yr iaith Gymraeg, Cymraeg 2050, yn gosod targedau hirdymor ar gyfer cynyddu nifer yr athrawon cyfrwng Cymraeg a Chymraeg fel a ganlyn. Yn fras, rydym yn recriwtio nifer digonol o athrawon cyfrwng Cymraeg i'r sector cynradd i allu cyrraedd y targedau. Fodd bynnag, mae cyrraedd y targedau ar gyfer y sector uwchradd yn her. Mae angen ffocws penodol ar gynyddu nifer yr athrawon uwchradd a all addysgu Cymraeg fel pwnc ac addysgu drwy gyfrwng y Gymraeg.

Nod y cynllun pontio

Nod y cynllun yw cynyddu nifer yr athrawon uwchradd cyfrwng Cymraeg. Cychwynnodd cynllun pontio peilot ym mis Medi 2020. Ers hynny mae 60 o athrawon wedi dilyn y cynllun. Yn sgil adborth cadarnhaol gan yr athrawon a’r ysgolion sydd wedi cymryd rhan byddwn yn parhau gyda’r cynllun yn 2024 i 2025 a chynnig cyfle i 20 athro arall.

Strwythur y rhaglen

Bydd y rhaglen yn cael ei darparu mewn partneriaeth rhwng ysgolion a darparwyr addysg gychwynnol athrawon (AGA) dros gyfnod o flwyddyn ysgol.

Bydd pedwar diwrnod o gefnogaeth yn cael eu darparu gan y darparwyr AGA ar y themâu canlynol:

• rheolaeth dosbarth
• rheolaeth Ymddygiad
• lles yr athro a datblygu dycnwch
• strategaethau Rheoli amser/llwyth gwaith
• trosolwg technegau cynllunio gwersi
• trosolwg o’r Cwricwlwm newydd
• mewnbwn ieithyddol: yn ôl angen yr unigolion

Bydd ysgolion yn gyfrifol am ddarparu ystod o brofiadau a chefnogaeth a fydd yn darparu datblygiad proffesiynol i unigolion ar y canlynol:

• mewnbwn pynciol
• marcio ac adborth
• cynllunio gwersi

Bydd disgwyl i bob unigolyn addysgu gwersi gydag amserlen yn cynyddu dros y flwyddyn. Bydd gan bob unigolyn fynediad i Gefnogwr Proffesiynol o fewn yr ysgol a fydd yn gyfrifol am gynnal deialog proffesiynol am ddatblygiad gyda’r unigolyn bob pythefnos ac i fod yn cefnogi mewn gwers unwaith y pythefnos.

Proses recriwtio a dethol

Edrychwn am 20 o unigolion brwdfrydig sydd â gweledigaeth gadarn dros ddatblygu disgyblion yn ddysgwyr annibynnol, hyderus a llwyddiannus. Mae’r cyfle hwn yn agored i geisiadau llawn amser neu ran amser.

Gwahoddwn geisiadau gan athrawon cymwys yn y categorïau canynol:

• athrawon cynradd yng Nghymru sydd â diddordeb mewn datblygu gyrfa mewn mewn ysgol uwchradd
• athrawon cynradd neu uwchradd sydd yn gweithio mewn ysgolion cyfrwng Saesneg yng Nghymru neu y tu allan i Gymru ond am ddychwelyd i ddysgu mewn ysgol uwchradd yng Nghymru ac angen cefnogaeth i bontio’n ieithyddol ac o ran gofynion y cwricwlwm
• athrawon cynradd ac uwchradd sydd am ddychwelyd i'r proffesiwn ar ôl cyfnod o bum mlynedd neu fwy

Croesewir ceisiadau gan unigolion i addysgu unrhyw bwnc, ond yn ddibynnol ar anghenion gwahanol ardaloedd yng Nghymru, rhoddir blaenoriaeth i unigolion sydd wedi cwblhau eu cyfnod sefydlu ac sy’n gallu addysgu’r pynciau canlynol:

• bioleg
• cemeg
• dylunio a thechnoleg
• gwyddoniaeth cyfrifiadurol/technoleg gwybodaeth
• mathemateg
• ieithoedd tramor modern
• ffiseg
• Cymraeg
• Saesneg

Bydd unigolion yn mynegi diddordeb i fod yn rhan o’r cynllun trwy Lywodraeth Cymru trwy lawrlwytho’r ffurflen ac e-bostio’r ffurflen gan ddefnyddio’r ddogfen isod. Bydd rhain yn cael eu rhannu gydag ysgolion partner i’w hystyried a symud y broses ymgeisio ffurfiol yn ei blaen.

Y dyddiad cau yw 16:00pm ar ddydd Mawrth 19 Mawrth 2024.

Bydd cyfweliadau yn cael eu cynnal yn yr ysgolion partner ar ôl gwyliau’r Pasg.

Bydd pob unigolyn yn derbyn cyflog ar y raddfa briodol am flwyddyn ysgol. Bydd yr unigolion yn derbyn cytundeb ac yn cael eu talu gan yr ysgolion/awdurdodau lleol. Ni fydd gwarant swydd barhaol ar ddiwedd y rhaglen, ond bydd cyfle i unigolion ymgeisio am swyddi gweigion mewn ysgolion uwchradd.

Dogfennau

Gwybodaeth bellach

Os oes angen gwybodaeth bellach arnoch, cysylltwch â thîm y Cynllun Pontio Cyfrwng Cymraeg ar AthrawonCC.WMTeachers@llyw.cymru