Google Gemini

Gemini yw cynorthwyydd Google sy'n cael ei bweru gan AI ac sydd wedi'i gynllunio i gefnogi dysgu ac addysgu ym mhob rhan o Google Workspace for Education. Er mwyn cadw at bolisïau diogelu data a chydymffurfio, dim ond drwy eu cyfrif Hwb y mae Google NotebookLM ar gael i ymarferwyr.

Sut i gael mynediad i Gemini yn Hwb

I gael mynediad i Gemini o wefan Hwb, mewngofnodwch a chliciwch ar yr ap Google ar ddangosfwrdd Hwb. Agorwch y waffl Google (y grid o sgwariau yn y gornel dde uchaf) a dewiswch Gemini.

I gael mynediad i Gemini y tu allan i wefan Hwb, agorwch gemini.google.com a mewngofnodwch gan ddefnyddio cyfrif Hwb. Edrychwch am logo Hwb yng nghornel dde uchaf y sgrin i sicrhau bod Gemini wedi'i fewngofnodi i gyfrif Hwb ac nid cyfrif Google personol.

Gems in Gemini

Mae Gemau yn anogwyr y gellir eu hailddefnyddio ac sy'n gallu cofio eu rôl, rheolau a deunyddiau neu ddogfennau ar draws pob sgwrs. Agorwch Gemini a chliciwch 'Explore Gems' yn y ddewislen ar y chwith. Dysgwch fwy am Gems in Gemini. 

Gellir rhannu Gemau gydag ymarferwyr eraill fel y gallant elwa o awgrymiadau a chyfarwyddiadau wedi'u teilwra. Ar ôl creu Gem, cliciwch yr eicon rhannu i rannu gydag eraill a rheoli pwy all weld neu olygu Gemau unigol. Darganfyddwch fwy am rannu gemau.

Sut y gall Gemini gefnogi ysgolion

Lleihau llwyth gwaith a phersonoli dysgu

• Drafftio cynlluniau gweithgareddau ystafell ddosbarth. gwahaniaethol a sylwadau adborth.
• Addasu adnoddau ar gyfer dysgwyr ag anghenion ychwanegol.
• Cefnogi cyfieithu deunyddiau i'r Gymraeg neu ieithoedd eraill.
• Cynhyrchu tasgau wedi’u sgaffaldio a gweithgareddau estyn.
• Dylunio diagramau pwrpasol, ffeithluniau a chymhorthion gweledol gan ddefnyddio generadur delweddau Gemini.
• Cefnogi archwilio pynciau cymhleth yn fanwl.

Cefnogi dysgu proffesiynol

• Awgrymu strategaethau ar gyfer rheoli’r ystafell ddosbarth ac addysgeg.
• Creu awgrymiadau myfyriol neu gwestiynau hyfforddi.

Gwella gweithrediadau ysgolion

• Drafftio cylchlythyrau, cyhoeddiadau a negeseuon at rieni.
• Creu dogfennau polisi, llawlyfrau a chofnodion cyfarfodydd.
• Cynhyrchu cynlluniau gweithredu a chrynodebau o ddata’r ysgol.
• Rhannu awgrymiadau gydag ymarferwyr eraill trwy Gems i gynorthwyo trosglwyddo gwybodaeth yn gyflym ac yn hawdd a helpu i greu cysondeb lle mae'n ddefnyddiol.

Gemini yn Google Classroom

Mae nodweddion Gemini wedi'u hymgorffori yn Google Classroom i helpu ymarferwyr i greu adnoddau a gwella ymgysylltiad dysgwyr. I gael mynediad i Gemini o fewn Google Classroom, agorwch Google Classroom a gellir dod o hyd i Gemini yn y ddewislen ar y chwith.

Sut y gall Gemini yn Google Classroom gefnogi ysgolion

• Drafftio aseiniadau a meini prawf.
• Creu fersiynau gwahaniaethol o'r un testun i gyd-fynd ag ystod o alluoedd darllen.
• Creu cwisiau a straeon. 
• Archwilio strategaethau ar gyfer y camsyniadau mwyaf cyffredin am bwnc.

Ystyriaethau allweddol 

• Dylid defnyddio Gemini yn unol â pholisïau ehangach ysgol fel llythrennedd digidol, diogelwch ar-lein, defnydd derbyniol, diogelu a gwarchod data. Dylai ei ddefnydd hefyd adlewyrchu unrhyw strategaethau AI presennol a osodwyd gan yr awdurdod lleol.
• Dylid ystyried yr holl wybodaeth a rennir gyda Gemini yn ofalus i gynnal preifatrwydd a diogelu. Mae ymarferwyr yn gyfrifol am sicrhau nad oes unrhyw wybodaeth bersonol, sensitif neu gyfrinachol yn cael ei rhoi i Gemini.
• Mae Gemini wedi'i gynllunio i gefnogi nid disodli barn broffesiynol. Gall gynhyrchu ymatebion anghywir neu ragfarnllyd ac mae'n agored i achosion o dorri hawlfraint. Gall ymddangos ei fod yn mynegi barn neu emosiynau personol, nad ydynt yn rhai go iawn. Yn ogystal, gall gamfarnu awgrymiadau; methu ag ymateb yn briodol neu gynnig atebion anaddas. Os ystyrir bod cynnwys a gynhyrchir gan Gemini yn amhriodol, rhaid ei adrodd i dîm TG yr ysgol, partner cymorth technoleg addysg neu awdurdod lleol. Darganfyddwch fwy am ganllawiau polisi ap Gemini.
• Sicrhau nad yw ffugiadau dwfn neu gynrychiolaethau a gynhyrchir gan AI o unigolion a gynhyrchir gyda Gemini yn cael eu creu na'u rhannu heb ganiatâd clir, gwybodus, er mwyn cynnal safonau moesegol a diogelu preifatrwydd.
• Gall Gemini gyfieithu deunyddiau i ieithoedd eraill, ond dylid ystyried hyn yn gyfieithiad symlach neu fras. Nid yw'n offeryn cyfieithu cymeradwy ac efallai na fydd yn gywir.
• I gael adnoddau ychwanegol ar AI cynhyrchiol, gan gynnwys arweiniad, hyfforddiant a gweithgareddau dysgu ewch i dudalen AI cynhyrchiol Cadw'n ddiogel ar-lein ar Hwb.

Terfynau defnydd

Dysgwch fwy am nodweddion ap Gemini a therfynau defnydd.

Cadw data 

Mae hanes sgwrsio Gemini yn parhau i fod yn hygyrch i ymarferydd unigol am 3 mis. Mae hyn yn caniatáu i ymarferydd ailymweld ag awgrymiadau yn hawdd. Ar ôl 3 mis caiff hanes y sgwrs ei ddileu'n awtomatig.

Sicrwydd data

• Dylai ysgolion ystyried a oes angen Asesiad newydd o’r Effaith ar Ddiogelu Data (DPIA), neu a ddylid diweddaru eu DPIA cyfredol. I gael rhagor o wybodaeth, cyfeiriwch at Supporting Your Data Protection Impact Assessment (DPIA) for Google Workspace with Gemini.
• Mae ymarferwyr sy'n defnyddio Gemini yn Hwb yn elwa o amddiffyniadau a rheolaethau gwell o'r enw Enterprise Data Protection. Gwnewch yn siŵr bod cyfrif Hwb yn cael ei ddefnyddio bob amser, nid cyfrif Google personol, gwiriwch yr eicon yn y gornel dde uchaf.
• Ni fydd awgrymiadau ac ymatebion yn cael eu hadolygu gan bobl ac ni chânt eu defnyddio i hyfforddi'r modelau iaith mawr sylfaenol (LLMs). Fodd bynnag, mae ysgolion yn parhau i fod yn rheolydd data ar gyfer unrhyw wybodaeth a fewnbynnir ac maent yn gyfrifol am sut y defnyddir yr allbwn data.
• Pan fydd ysgol yn ystyried defnyddio offer AI mewn ffordd a allai gynnwys data personol neu gategori arbennig, dylai:
  • gynnal Asesiad Effaith Diogelu Data lleol
  • gofyn am gyngor gan swyddog diogelu data'r ysgol

Mae hyn yn helpu i sicrhau bod unrhyw risgiau yn cael eu deall a'u rheoli'n briodol yn y cyd-destun lleol. Mae enghreifftiau o ddata categori personol a sensitif yn cynnwys:

• • data personol fel enwau, cyfeiriadau e-bost, dynodwyr dysgwyr, dyddiadau geni neu unrhyw wybodaeth a allai adnabod unigolyn
  • data categori arbennig fel gwybodaeth iechyd, manylion diogelu, anghenion dysgu ychwanegol neu ddata cydraddoldeb ac amrywiaeth
• Dim ond gwybodaeth a rennir mewn awgrymiadau, ffeiliau wedi'u huwchlwytho neu wybodaeth sydd ar gael i'r cyhoedd y mae Gemini yn ei defnyddio.
• Gall Gemini yn eich Google Classroom Hwb gael mynediad at y cynnwys a rennir yn yr ystafell ddosbarth benodol honno, ynghyd â gwybodaeth sydd ar gael i'r cyhoedd. Os yw data dysgwyr wedi'i gynnwys mewn ffeil yn Google Classroom (sydd yn weladwy i bawb), yna gall Gemini yn Google Classroom gael mynediad iddo. Nid oes ganddo fynediad at wybodaeth cyfrif y dysgwr
• Mae Gemini a Gemini yn Google Classroom drwy Hwb yn parchu'r caniatâd a'r rheolaethau mynediad a osodir o fewn Google Workspace Hwb.
• Mae Gemini a Gemini yn Google Classroom trwy Hwb yn cadw at ymrwymiadau preifatrwydd a diogelwch, gan gynnwys GDPR y DU. Ewch i'r Generative AI in Google Workspace Privacy Hub i gael mwy o wybodaeth.

Prosesu data

Natur y prosesu

Mae Gemini yn casglu data yn uniongyrchol gan ddefnyddwyr drwy:

• bromptiau
• ymholiadau
• cynnwys a ffeiliau a lanlwythir
• metadata sydd ei angen i ddarparu gwasanaethau.

Mae’r mewnbynnau hyn yn cael eu prosesu i gefnogi tasgau proffesiynol ac addysgol.  

Mae’r holl brosesu yn digwydd o fewn ffin ymddiriedaeth ddiogel Hwb ar Google Workspace. Mae Google yn gweithredu o dan reolaethau diogelu data sy’n addas ar gyfer sefydliadau mawr a lywodraethir gan y Google Workspace for Education Terms of Service a’r Cloud Data Processing Addendum (CDPA). Mae pob rhyngweithiad yn cael ei gofnodi gan y system ar gyfer cydymffurfio â GDPR y DU.

Nid yw promptiau, lanlwythiadau ac ymatebion byth yn cael eu defnyddio i hyfforddi neu wella modelau AI Google. Nid ydynt byth yn cael eu hadolygu gan bobl ac nid ydynt byth yn cael eu gwerthu i drydydd partïon.

Mae nodweddion Google AI yn parchu’r holl ffiniau a chaniatadau presennol o ran mynediad i barthau. Os nad oes gan ddefnyddiwr ganiatâd penodol i gael mynediad at ffeil neu ffolder benodol, ni all y gwasanaeth AI adfer na rhyngweithio â’r data hwnnw. 

Nid yw Gemini a Gemini Notebook yn sefydlu cysylltiad uniongyrchol rhwng rhwydwaith lleol y defnyddiwr a’r rhyngrwyd gyhoeddus. Yn hytrach, mae prosesau adalw gwybodaeth fyw yn dibynnu ar fecanwaith mewnol sylfaenu chwiliadau (search grounding) yn erbyn mynegai gwe Google; mae’r gwasanaeth yn gwneud ymholiadau allanol i fynegai Chwilio Google, gan ddod â chynnwys gwe allanol yn ôl i’r sesiwn ddiogel.

Cwmpas y prosesu

Gall y data a brosesir gynnwys: 

• promptiau testun a fewnbynnwyd gan ddefnyddwyr
• ffeiliau a lanlwythwyd gan ddefnyddwyr
• allbynnau AI fel testun, cynlluniau gwersi, cwestiynau cwis a chrynodebau a gynhyrchwyd
• cofnodion y system, gan gynnwys data mewngofnodi sylfaenol, stampiau amser, a llwybrau archwilio

Mae ysgolion, fel rheolydd data, yn penderfynu a yw data categori arbennig neu ddata troseddol yn cael eu prosesu wrth ddefnyddio Gemini. Pan fydd ysgol yn dewis gwneud hynny, rhaid nodi hyn yn ei Hasesiad o’r Effaith ar Ddiogelu Data lleol. Dylai ysgolion nodi mesurau diogelu priodol, gan gynnwys:

• leihau data
• cyfyngu ar y dibenion
• canllawiau i staff ar ddefnydd priodol.

Mae faint o ddata a brosesir, a pha mor aml, yn dibynnu ar ddefnydd staff a’r dull gweithredu lleol. Mae hanes sgyrsiau ar gael i ddefnyddwyr am hyd at 3 mis, os na chaiff ei dileu gan y defnyddiwr neu oherwydd polisi cadw’r sefydliad. 

Mae nifer yr unigolion yr effeithir arnynt wedi’i gyfyngu i staff awdurdodedig sy’n defnyddio Gemini yn yr ysgol. Mae Gemini wedi’i ddiffodd i ddysgwyr.

Prosesir y data yn ddiogel o fewn seilwaith AI cwmwl Google. Fodd bynnag, nid oes unrhyw ddata yn cael eu cadw na’u defnyddio ar gyfer hyfforddi’r model yn y canolfannau prosesu hyn. Mae data llonydd (data at rest) (hanes sgyrsiau a chofnodion) yn cael eu storio’n ddiogel o fewn ffin tenant rhanbarthol a reolir Hwb ar Google Workspace for Education.

Trosglwyddir data i brif ddarparwyr gwasanaeth Google yn yr Undeb Ewropeaidd (Iwerddon). 

Gwahaniaethau rhwng cyfrif Google yn Hwb a chyfrif Google personol