Trefniadau cydweithio

Mae Llywodraeth Cymru, awdurdodau lleol a Chonsortia Addysg Rhanbarthol wedi ymrwymo i gydweithio ar ymagwedd genedlaethol tuag at dechnoleg a gwasanaethau addysg ddigidol ar gyfer ysgolion sy’n cyd-fynd â strwythur y Daith Dysgu Proffesiynol Digidol. Bydd yr ymagwedd hon yn galluogi ysgolion a gynhelir yng Nghymru i archwilio’r manteision trawsnewidiol y gall digidol a thechnoleg eu cael ar addysg.

Mae dau brif grŵp sy’n helpu i oruchwylio a chefnogi rhaglen Hwb i gyflawni ei nodau.

Awdurdod Cyflawni Technoleg Addysg (ETDA)

Mae’r grŵp yn cynnwys cynrychiolwyr strategol o Lywodraeth Cymru, pob awdurdod lleol a Chonsortia Addysg Ranbarthol. Mae’r grŵp yn cyfarfod bob chwarter ac yn gyfrifol am:

• sicrhau bod rhaglen Hwb yn darparu seilwaith digidol i gefnogi’r Cwricwlwm i Gymru
• sicrhau bod safbwyntiau pob awdurdod lleol yn cael eu hystyried o ran y gwasanaethau digidol sydd ar gael drwy Hwb
• cymeradwyo argymhellion strategol y Grŵp Safoni Technoleg

Grŵp Safoni Technoleg

Mae’r grŵp yn cynnwys cynrychiolwyr o Lywodraeth Cymru a phob awdurdod lleol. Mae’r grŵp yn cyfarfod bob chwarter ac mae’n gyfrifol am y canlynol:

• darparu cyngor ac arweiniad arbenigol ar Safonau Digidol Addysg er mwyn sicrhau eu bod yn parhau’n gywir, yn addas i’w diben ac yn briodol i ysgolion eu defnyddio
• rhannu barn er mwyn llywio cynhyrchion a gwasanaethau Hwb heddiw ac i’r dyfodol
• cydweithio i benderfynu beth yw anghenion seilwaith digidol ysgolion, fel y gallwn brynu cyfarpar a gwasanaethau digidol “Unwaith i Gymru” a sicrhau gwerth da am arian, na ellid ei gyflawni fel arall
• sicrhau bod y catalog TGCh cenedlaethol ar gyfer ysgolion yn cynnwys y seilwaith, y dyfeisiau a’r cyfarpar ystafell ddosbarth sydd eu hangen ar ysgolion i gyflwyno dysgu ac addysgu rhagorol a’r Cwricwlwm i Gymru.