Trefniadau cydweithio

Mae Llywodraeth Cymru, awdurdodau lleol a Phartneriaid Gwella Ysgolion wedi ymrwymo i:

• weithio gyda'i gilydd ar ddull cenedlaethol dan arweiniad y sector i sicrhau bod mentrau EdTech yn cael yr effaith fwyaf bosibl
• hwyluso’r broses o fabwysiadu a defnyddio gwasanaethau Hwb yn effeithiol

Mae'r dull hwn yn galluogi ysgolion a gynhelir yng Nghymru i wneud y gorau o'r manteision trawsnewidiol y gall adnoddau digidol a thechnoleg eu cynnig i fyd addysg, gan gefnogi'r Cwricwlwm i Gymru.

Mae dau grŵp allweddol sy'n goruchwylio ac yn cefnogi rhaglen Hwb i gyflawni ei nodau.

Dysgu Digidol Cymru (DDC)

Mae Dysgu Digidol Cymru yn is-grŵp o Gymdeithas Cyfarwyddwyr Addysg Cymru (CCAC). Mae'r grŵp yn cynnwys cynrychiolwyr strategol o Lywodraeth Cymru, pob awdurdod lleol, Phartneriaid Gwella Ysgolion, Cymdeithas Llywodraeth Leol Cymru (CLlLC) ac Estyn.

Mae'r grŵp yn cyfarfod bob tymor ac yn gyfrifol am:

• bennu'r weledigaeth strategol ar gyfer gwasanaethau addysg ddigidol yng Nghymru
• sicrhau bod rhaglen Hwb yn rhoi seilwaith digidol i gefnogi'r Cwricwlwm i Gymru
• sicrhau bod barn yr holl awdurdodau lleol a’r Partneriaid Gwella Ysgolion yn cael ei ystyried o ran y gwasanaethau digidol sydd ar gael drwy Hwb
• cymeradwyo argymhellion strategol y Grŵp Safoni Technegol

Y Grŵp Safoni Technegol (GST)

Mae'r Grŵp Safoni Technegol (GST) yn grŵp o arbenigwyr technegol, o bob awdurdod lleol yng Nghymru. Nod y grŵp yw cefnogi darpariaeth dechnegol Rhaglen Hwb.

Mae'r GST yn cyfarfod bob tymor i drafod a rhoi diweddariadau i'r grŵp yn unol â'u cyfrifoldebau. Mae’r grŵp yn gyrru’r gwaith o greu, goruchwylio a darparu gwasanaethau technegol ar Hwb. Mae hyn yn cyfrannu at fapio datblygiad a llunio manylebau ar gyfer gwasanaethau newydd a’r rhai presennol. Mae hyn yn hyrwyddo dull safonol ar gyfer awdurdodau lleol ac ysgolion ledled Cymru.

Datblygwyd Safonau a Chanllawiau Digidol Addysg gan y GST. Maent yn cynorthwyo i roi profiad technegol safonol a chyson i ysgolion a gynhelir yng Nghymru. Mae cytuno ar fframwaith technegol cyffredin yn rhoi arweiniad i ysgolion wrth iddynt ddatblygu eu hamgylcheddau digidol.

Mae'r grŵp yn hyrwyddo dull 'Unwaith dros Gymru' o gaffael technoleg addysg. Maent yn cytuno ar y cynnyrch a'r gwasanaethau a roddir trwy fecanwaith caffael cenedlaethol. Mae hyn yn sicrhau bod y cynnyrch a’r gwasanaethau sydd ar gael yn addas. Mae'n cefnogi mynediad teg i awdurdodau lleol ac ysgolion a gynhelir yng Nghymru. Mae hyn yn rhoi budd ariannol a chynaliadwyedd o ran offer a gwasanaethau.

Aelodaeth a manylion cyswllt