HiPal: Walkie Talkie

Ap rhwydweithio cymdeithasol a ddatblygwyd gan VPings Inc. yn 2018 yw HiPal. Bwriad yr ap yw bod fel walkie-talkie, gan weithredu yn yr un ffordd ag y byddai walkie-talkie traddodiadol ond yn ddigidol. Mae gan y swyddogaeth walkie-talkie gyrhaeddiad diderfyn ac mae'n gallu cynnal galwadau grwp mawr, er mae’n rhaid i ddefnyddwyr dalu tanysgrifiad i wneud hyn. Mae gan HiPal nifer gweddol fach o ddilynwyr ar TikTok, lle mae defnyddwyr yn hoffi postio sgyrsiau a gawsant ar yr ap. Mae HiPal ar gael ar App Store Apple a Google Play.

---

Sgôr oedran swyddogol

12 oed yw'r cyfyngiad oedran ieuengaf ar gyfer defnyddwyr HiPal, ond nid yw'n ymddangos bod unrhyw ddulliau gwirio oedran penodol.

Er mai 12 yw'r isafswm oedran yr awgrymir gan HiPal, mae defnyddwyr 12 ac iau yn dal i allu defnyddio'r ap. Gall defnyddwyr yn yr ystod oedran hwn gael mynediad at nodweddion craidd HiPal, megis y walkie-talkie. Mae nodweddion ar-lein ehangach, fel y swyddogaeth 'Explore', wedi'u cyfyngu i ddangos cysylltiadau a ychwanegwyd gan y defnyddiwr yn unig. Mae gan ddefnyddwyr sydd wedi cofrestru fel rhai 12+ oed, fynediad llawn at nodweddion ar-lein HiPal.

Mae HiPal wedi cael sgôr o 12+ (Teens) ar Apple App Store a Google Play.

Dysgwch fwy am sgoriau oedran yn ein 'Canllaw i rieni a gofalwyr ar sgoriau oedran mewn apiau a gemau’.

---

Sut mae plant a phobl ifanc yn defnyddio'r ap

Defnyddir HiPal fel walkie-talkie ar gyfer digwyddiadau bywyd go iawn, megis wrth chwarae gemau fideo gyda ffrindiau, neu fel sianel sgwrsio uniongyrchol. Gan fod HiPal yn newid yn rheolaidd, mae’r ffordd mae pobl ifanc yn defnyddio’r ap yn newid hefyd ac mae diddordeb ynddo’n amrywio o gyfnod i gyfnod. Gan fod defnyddwyr yn gorfod talu ffi danysgrifio i ddefnyddio’r elfen galwadau ar hyn o bryd, mae pobl ifanc yn defnyddio apiau rhad ac am ddim eraill i ffonio a chadw mewn cysylltiad â’u ffrindiau.

---

Nodweddion allweddol a therminoleg

---

Risgiau posibl

Cynnwys

Mae HiPal yn diweddaru cynllun a nodweddion yn gyson, yn enwedig y modd mae defnyddwyr yn gallu rhyngweithio a rhannu cynnwys gyda’i gilydd. Gan fod yr ap yn newid yn rheolaidd, dylai rhieni a gofalwyr gadw llygad ar swyddogaethau’r ap a sut mae eu plentyn yn ei ddefnyddio.

Gall defnyddwyr HiPal anfon negeseuon ysgrifenedig at ddefnyddwyr eraill ar eu platfform am ddim ar hyn o bryd, yn wahanol i’r opsiwn ffonio sydd angen talu amdano trwy danysgrifiad. Mae negeseuon sgwrsio HiPal yn diflannu pan fydd defnyddiwr yn allgofnodi. Mae hyn yn cyflwyno risg y gallai defnyddwyr deimlo'n eofn neu'n dueddol o rannu cynnwys y mae'n tybio na ellir ei weld eto. Gan nad oes hanes sgwrsio, go brin y bydd cofnod o'r hyn mae'r anfonwr wedi'i ddweud neu ei anfon drwy'r ap, oni bai bod defnyddiwr wedi tynnu sgrinlun o'r sgwrs dan sylw. Gallai hyn fod yn berthnasol i bob math o sefyllfaoedd, gan gynnwys rhannu lluniau noeth, sylwadau hiliol neu atgas neu'n bwlio ac aflonyddu ar-lein. Cofiwch atgoffa'ch plentyn i feddwl yn ofalus am y cynnwys y mae'n dewis ei rannu.

Cysylltu ag eraill

Gall defnyddwyr HiPal gysylltu ag eraill trwy rannu cod unigryw neu sganio cod QR, y gellir ei rannu’n bersonol ac ar-lein. Unwaith y byddant wedi cysylltu, gall defnyddwyr anfon neges neu ffonio ei gilydd. Yn achos cysylltiadau sy’n cael eu gwneud trwy rannu’r cod ar-lein, mae'n hynod anodd gwybod a yw'r sawl sy'n sgwrsio ar yr ap yn dweud y gwir am bwy ydy o neu hi, a gan fod negeseuon sgwrsio ar HiPal yn diflannu pan fydd defnyddiwr yn allgofnodi does dim cofnod o bwy mae'ch plentyn yn rhyngweithio â nhw na sut. Gallai hyn hwyluso ymddygiad fel meithrin perthynas amhriodol, bwlio neu aflonyddu rhywiol, gan fod sgyrsiau'n diflannu heb adael unrhyw gofnod gweledol o beth ddigwyddodd, ac felly'n anodd i'w olrhain. Mae'n bwysig bod plant a phobl ifanc yn meddwl yn ofalus am y bobl maen nhw'n dewis cysylltu â nhw ac ystyried defnyddio'r ap dim ond er mwyn ymgysylltu â ffrindiau cyfarwydd. Siaradwch â'ch plentyn am beryglon cysylltu â dieithriaid ac esboniwch bwysigrwydd peidio â rhannu unrhyw wybodaeth bersonol neu adnabyddadwy mewn sgyrsiau. Atgoffwch eich plentyn i ddweud wrthych chi os oes rhywun wedi gofyn cwestiynau mwy personol neu'n gofyn am sgwrs breifat mewn ap gwahanol. 

Mae rhannu lleoliad byw yn elfen ganolog o HiPal, a does dim modd analluogi hyn, ac mae’n ymddangos yn gyhoeddus i ffrindiau’r defnyddiwr bob amser. Gallai hyn beri cryn risg i ddefnyddwyr iau gan fod eu lleoliad byw yn hygyrch bob amser i rai sy’n adnabod y defnyddiwr. Mae’r risg yn fwy mewn achosion lle cafodd cysylltiadau eu gwneud ar-lein, a lle nad yw’ch plentyn yn gyfarwydd â’r ffrind newydd a wnaed ar-lein, yn y byd go iawn. Gofalwch bod eich plentyn ond yn cysylltu â rhai y mae’n eu hadnabod ar HiPal, a’i atgoffa i beidio â rhannu ei leoliad â phobl nad yw’n eu hadnabod nac yn ymddiried ynddynt. Trafodwch beryglon rhannu lleoliad gyda dieithriaid, a’i annog i ddweud wrthych os oes rhywun wedi gofyn iddo/iddi rannu lleoliad neu os yw wedi cael ymweliadau digroeso gan bobl ar y platfform.

Ymddygiad defnyddwyr

Ar HiPal, mae cofnodion sgyrsiau yn diflannu pan fydd defnyddiwr yn allgofnodi. Gallai diffyg hanes sgwrsio effeithio ar allu'r heddlu neu awdurdodau perthnasol eraill i ymchwilio i faterion pryderus a allai fod wedi digwydd drwy'r ap. Mae'n bosib i ddefnyddiwr dynnu sgrinlun o sgwrs, ond gallai fod yn anodd i rywun sy'n cael ei aflonyddu neu ei gam-drin feddwl gwneud hyn yn y foment. Da chi, anogwch eich plentyn i ddweud wrthych chi a yw'n cymryd rhan mewn sgwrs sy'n gwneud iddo/iddi deimlo'n anghyfforddus, a thynnu sgrinlun lle bo modd. Atgoffwch eich plentyn i feddwl yn ofalus am y cynnwys y mae'n dewis ei rannu ar yr ap. Mae'n bwysig egluro i'ch plentyn y gall unrhyw un dynnu sgrinlun o bob cynnwys, ei gadw a'i rannu'n eang. Mae'n bwysig ystyried y cynnwys maen nhw'n ei greu a'i rannu bob amser, drwy feddwl yn ofalus a fydden nhw'n hapus i bawb maen nhw'n eu hadnabod weld y cynnwys. 

Dyluniad, data a chostau

Fel gyda llawer o apiau negeseuon eraill, mae wedi'i gynllunio i ennyn diddordeb defnyddwyr a'u cadw ar y platfform am gyfnodau estynedig. Gall fod yn anodd i blant wrthsefyll yr holl hysbysiadau gan eu hannog i ymateb ac ymgysylltu. Anogwch eich plentyn i gymryd hoe trwy newid y gosodiadau hysbysu i leihau nifer yr hysbysiadau mae'n eu derbyn.

Tra bod defnyddwyr yn gallu cofrestru â HiPal am ddim, mae gan lawer o nodweddion yr ap, a arferai fod am ddim, gynllun talu erbyn hyn. Mae HiPal yn annog defnyddwyr i wneud tanysgrifiad blynyddol i gael defnydd diderfyn o’r elfennau walkie talkie a sgyrsiau grŵp. Os yw’ch plentyn yn mynegi diddordeb mewn defnyddio nodwedd llais ei ffôn, dylech ei annog i ffonio ei ffrindiau trwy ddefnyddio nodweddion galw parod ei ddyfais symudol. Atgoffwch eich plentyn mai ffordd arall o wneud arian yw tanysgrifiadau gan apiau a phlatfformau.

---

Sut i gadw'ch plentyn yn ddiogel

---

Cyngor cyffredinol

Er y gall fod yn ddiogel i ddefnyddio HiPal gyda ffrindiau lleol ar y cyfan, dylech fonitro defnydd eich plentyn o'r ap. Siaradwch â'ch plentyn yn rheolaidd am y bobl y mae'n cysylltu â nhw ar HiPal a'i atgoffa am beryglon sgwrsio â dieithriaid. Fel ap sydd wedi'i gynllunio i efelychu walkie-talkie, efallai yr hoffech ddweud wrth eich plentyn am gyfyngu ar y defnydd o'r ap i'r nodwedd walkie-talkie gyda ffrindiau cyfarwydd yn unig.

I ddileu cyfrif defnyddiwr o fewn HiPal:

• Ewch i 'Settings' (eicon gêr) ar y gornel chwith uchaf a dewis 'Delete Account’.
• Pwyswch ‘Continue’ a ‘Confirm’ i ddileu'r cyfrif.

I gyrchu swyddogaeth e-bostio adborth o fewn HiPal:

• Ewch i 'Settings' (eicon gêr) ar y gornel chwith uchaf.
• Yna, chwiliwch a thapio ar ‘Feedback’.